राजविराज । आफ्ना दाजुको सुनसरीको इटहरीस्थित घर गएका सप्तरीका एक व्यक्तिको शव भेटिएको छ ।
सप्तरीको तिरहुत गाउँपालिका वडा नम्बर ४ डिमन घर भएका बिरेन्द्र यादव इटहरी उपमहानगरपालिका वडा नम्बर १४ मा मृत भेटिएका हुन् । गत ३१ असारमा उनी मृत भेटिएको परिवारजनले बताएका छन् ।
५१ बर्षीय यादव २७ असारमा इटहरीस्थित आफ्ना दाजु दीपनारायणको घर गएका थिए । प्रहरी नायव निरीक्षक रहेका आफ्ना दाजुको घरमा राति सँगै खाना खाएर सुतेका थिए उनी । तीन तल्ले घरमध्ये बीचको तल्लामा उनी सुतेका थिए ।
बिहान उठेर हेर्दा उनी घरमा थिएनन् । दाजु दीपनारायणले वाक गर्न गएको होला भन्ने ठम्याई गरे । ढिलो हुन थालेपछि फोन पनि गरे । तर उनको फोन उठेन् । ‘mगातार ठूलो बुवाले फोन गर्दा पनि फोन उठेन्’ मृतकका छोरा नितेशले भने, ‘यो जानकारी पाएपछि मैले पनि फोन गरें, तर उहाँको फोन नै उठेन् ।’
नितेशका अनुसार ठूलो बुवाले भनेपछि जिल्ला प्रहरी कार्यालय, सप्तरीमा पनि गएर जानकारी गराइयो । तर यहाँका प्रहरीले ढिलो नगरी इटहरी प्रहरी समक्ष पुग्न भनेपछि त्यहीं पुगेर इलाका प्रहरी कार्यालय इटहरीमा निवेदन दिएको उनले बताए ।
‘निवेदन दिनासाथ प्रहरीले बुवाको मोवाइल ट्रेसिङ गर्दा इटहरीमै देखियो । तर खोजी गर्दा भेटिनुभएन्’ नितेश भन्छन्, ‘हामी पनि चारैतिर खोजी ग¥यौं ।’
प्रहरीले मोवाइल ट्रेस गर्दा इटहरीमै देखाउने र व्यक्ति फेला पर्न नसकेको उनको भनाई छ ।
बिरेन्द्रको शव भेटिनुअघि आईतबार साँझ धनकुट्टाको छिन्ताङमा मोवाइलको लोकेशन देखिएको थियो । ‘त्यहाँको लोकेशन देखिएपछि हामी भोलिपल्ट त्यहाँ जाने सोंच बनायौं’ नितेशले भने, ‘तर, शव नै भेटिएपछि हामी तनावमा आयौं ।’
मृत भेटिएका बिरेन्द्रको धरानस्थित विपि कोइराला स्वास्थ्य विज्ञान प्रतिष्ठानमा पोष्टमार्टम गरिएको छ । उनको शवलाई कोशी व्यारेजमा अन्तिम संस्कार गरिएको छ ।
इलाका प्रहरी कार्यालय इटहरीका प्रमुख डीएसपी टेकबहादुर कार्कीले भेटिएको यादवको शवलाई पोष्टमार्टम गराई आफन्तलाई बुझाइएको बताए । ‘पोष्टमार्टमको रिपोर्ट आएपछि केहि भन्न मिल्छ’ उनले भने, ‘अन्य अनुसन्धान भइरहेको छ ।’
