राजविराज । सप्तरीबाट निर्वाचित प्रतिनिधी सभा सदस्य दिनेश यादवले सप्तरीको सन्दर्भमा तीन वटा जिज्ञासा प्रधानमन्त्री समक्ष राखेका छन् । यो जिज्ञासामा प्रधानमन्त्री केपी शर्मा ओलीले सकारात्मक प्रतिबद्धता जनाएका छन् ।
सोमबार प्रतिनिधी सभामा प्रधानमन्त्रीसँगको प्रश्नोत्तर गर्ने क्रममा सप्तरी क्षेत्र नम्बर ३ बाट निर्वाचित सांसद यादवले कोशी सम्झौता अनुसार कोशी व्यारेजदेखि लौकही भारतीय सिमानासम्म ३२ किलोमिटर पश्चिमी कोशी नहरका जनतालाई धेरै पीडा खेप्नुपरिरहेको बताए । ‘यो नहर हुँदै आवतजावत गर्ने नेपाली जनतालाई असहय भएको छ’ उनले भने, ‘गर्मीमा धुलैधुलो, बर्षामा हिलैहिलो भइरहँदा जनजीवन कष्टकर बनेको छ ।’
सांसद यादवले गाईघाटदेखि बनैनियाँसम्म ३० किलोमिटरसम्म सडक निर्माणका लागि हुलाकी आयोजनाले अर्थ मन्त्रालयमा स्वीकृतिका लागि फायल पेश गर्दा अघि बढ्न नसकेको बताए । उनले पहाड र मधेशको सम्बन्ध राम्रो बनाउन यो सडक अति आवश्यक भएको धारणा राखे ।
उनले कमला कोशी डाईभर्सनलाई सप्तरीसम्म जोड्न पहल गर्न पनि प्रधानमन्त्रीसँग आग्रह गरे ।
सभामुख देबराज घिमिरेले प्रश्न भन्दा पनि मागै राखेको बताएपनि प्रधानमन्त्री ओलीले सकारात्मक प्रतिबद्धता जनाएका छन् ।
प्रधानमन्त्रीले कोशी पश्चिमी नहरको बाँधमा क्रमशः सडक कालोपत्रे भइरहेको बताए । उनले नहरको किनार अतिक्रमण भएकाले त्यसलाई हटाएर कालोपत्रे गर्न नेपाल र भारत द्धिपक्षीय संयन्त्र मार्फत् अनुरोध गरिने उल्लेख गरे ।
गाईघाट बनैनियाँ सडक यस आर्थिक बर्षमा प्राथमिकताका साथ अघि बढाइने प्रधानमन्त्रीको प्रतिबद्धता थियो ।
कमला कोशी डाइभर्सन काम अध्ययनको क्रममा रहेको उल्लेख गर्दै प्रधानमन्त्रीले अध्ययन भएपछि कार्यान्वयनको बाटोमा लगिने बताए ।
