राजविराज । गोली हानी वन्यजन्तु बँदेल मारेपछि पक्राउ परेका १० जना रिहा भएका छन् । उनीहरु सबैलाई जिम्मा जमानीमा छाडिएको छ ।
सुनसरीको इटहरी उपमहानगरपालिका वडा नम्बर २ निवासी पूर्व डीआईजी ज्ञानविक्रम शाह, मोरंगको विराटनगर महानगरपालिका वडा नम्बर ३ निवासी नेपाल प्रहरीका बहालबाला सई सञ्जय न्यौपाने, हनुमाननगर कंकालिनी–८ निवासी पूर्व उपसभामुख गंगा यादवका छोरा आकाश बहरखेर यादव, सप्तरीको तिरहुत–२ निवासी लक्ष्मण मण्डल, हनुमाननगर कंकालिनी वडा नम्बर २ निवासी जनार्दन राउत, सुनसरीको इटहरी २ निवासी प्रदीप लिम्बु, राजविराज–७ निवासी रविन दास, हनुमाननगर कंकालिनी ५ निवासी ओमशंकर प्रसैला, वडा १ निवासी लक्ष्मण मण्डल र वडा नम्बर ३ निवासी शंकर खिडहरी यादव पक्राउ परेका थिए ।
गोली प्रहार गरी बँदेल मारेर को.२त ६९ नम्बरको ट्याक्टरमा लोड् गर्दै गर्दा उनीहरुलाई प्रहरीले बिहीबार बिहान नियन्त्रणमा लिएको थियो ।
हनुमाननगर कंकालिनी नगरपालिका–१ कोशी पलार क्षेत्रबाट पक्राउ परेका उनीहरुको साथबाट २२ क्यालीबरको राइफल, दुई म्यागजिन, १५ राउण्ड गोली, तीन वाइनाकुलर, एक ट्राइपोड, एक फलामको हथौडा, र एक खुर्पा बरामद गरेको थियो ।
राइफल र गोलीको अनुमति प्राप्त भए÷नभएको सन्दर्भमा अनुसन्धान भइरहेको सप्तरीका प्रहरी प्रमुख एसपी गजुसिद्धि बज्राचार्यले बताए ।
प्रहरीले मृत अवस्थामा फेला परेको बँदेललाई बेवारिसे घोषित गर्दै डिभिजन वन कार्यालयमा प्रतिवेदन बुझाएको छ ।
प्रहरीले घटनाको अनुसन्धान चलिरहेको भन्दै बिहीबार राति नै उनीहरूलाई जिम्मा जमानीमा रिहा गरेका हुन् ।
