राजविराज । सप्तरीको कंचनरुप नगरपालिका वडा नम्बर २ बरमझियास्थित सशस्त्र प्रहरीको तालिम शिक्षालयको उद्घाटन भएको छ ।
यसअघि दन्तकाली गणको रुपमा रहँदै आएको यो कार्यालय २०७५ सालदेखि सशस्त्र प्रहरी बल नेपाल दन्तकाली बिशेष कार्य तालिम शिक्षालयको रुपमा विकसित भएको हो ।
शिक्षालयको शुक्रबार सशस्त्र प्रहरी बल नेपालका महानिरीक्षक राजु अर्यालले एक भव्य कार्यक्रमकाबीच उद्घाटन गरेका छन् ।
महानिरिक्षक अर्यालले शिक्षालयको कार्यालय भवन अगाडि तयार गरिएको शिलालेखको पर्दा अनावरण गरी उद्घाटन गर्दै शान्तिको प्रतिक एक जोडी सेतो परेवा समेत उडाए ।
उक्त अवसरमा बोल्दै महानिरीक्षक अर्यालले सशस्त्र प्रहरी बलको कार्य प्रकृति अनुसारका तालिम केन्द्रहरु रहेको बताउँदै तालिमहरुको विभाजन गरी उल्लेखित स्थानहरुमा मात्र तालिमहरु संचालन गरिने जानकारी गराए ।
बिपद ब्यबस्थापन, हुल तथा दंगा, सिमा सुरक्षा, युएन शान्ती स्थापना सम्बन्धी तालिमहरु संचालनको लागि तालिम शिक्षालयहरु रहेकोमा अब देखी बिशेष प्रकृतिका कार्यहरुसँग सम्बन्धित तालिम प्रदान गर्ने गरी सप्तरीमा तालिम केन्द्रको स्थापना गरिएको उनले बताए ।
एन्टि टेरोरिजम, होस्टेज रेस्क्यू, फायर फाइटिङ् एबं पानी रेस्क्यू सम्बन्धित तालिमहरु उल्लेखित शिक्षालयमा संचालन गरिने महनिरिक्षक अर्यालले बताए ।
कार्यक्रममा तालिम केन्द्रमा उत्कृष्ट कार्य गर्ने सशस्त्र प्रहरी उपरीक्षक सहित १८ जनासहित शिक्षालयलाई प्रत्यक्ष सहयोग गर्ने नगरपालिका, गाउँपालिका तथा स्थानीय ब्यक्तिलाई समेत प्रशंसा पत्रद्वारा सम्मान गरियो ।
