राजविराज । प्रायः विद्यालयको अनुगमन गर्ने पालिका प्रमुखमध्येका एक हुन् उमेश प्रसाद यादव । सप्तरीको बिष्णुपुर गाउँपालिकाका अध्यक्ष यादव आईतबार पनि बिभिन्न सामुदायिक विद्यालयको अनुगमन गरे ।
प्रमुख प्रशासकीय अधिकृत, शिक्षा संयोजकसहित उनी अन्य विद्यालयसहित गाउँपालिकाको वडा नम्बर १ थलहीस्थित जनता आधारभूत विद्यालय पनि छिरे । उनले विद्यालयका विद्यार्थीको स्तर मापनको काम शुरु गरे ।
कक्षा ८ मा छिरेका उनले नेपाली बिषयको एउटा पाठ प्रायः विद्यार्थीलाई पढ्न लगाए । कतिले पढ्नै सकेनन् भने पढ्नेले पनि राम्रोसँग उच्चारण गर्न सकेनन् ।
‘कक्षा ८ मा अध्ययन गर्ने विद्यार्थीले नेपाली बिषय पढ्न सकेनन्’ अनुगमनपछि पालिका अध्यक्ष यादवले भने, ‘योभन्दा बढी दुःखको कुरा के हुन सक्छ ?’
उनले कक्षा ८ कै विद्यार्थीलाई सामान्य जोड, घटाउ र गुणन, भागा नआएको बताए ।
सिकाई अत्यन्तै कमजोर देखिएपछि अध्यक्ष यादवले यसलाई सुधार्न शिक्षकहरुलाई निर्देशन दिएका छन् ।
आगामी अनुगमनमा विद्यार्थीको सिकाईस्तरमा परिवर्तन नदेखिए शिक्षकहरुलाई कार्वाहीको प्रकृया अघि बढाउने अध्यक्ष यादवले बताए ।
