राजविराज । मधेश प्रदेश सरकारको उद्योग, बाणिज्य तथा पर्यटन मन्त्री सकील अलीले इँटा उद्योगीको समस्यालाई आफूले नजिकबाट हेरेको बताएका छन् । उनले समस्या समाधानका लागि प्रदेश सरकार तत्पर रहेको बताए ।
सप्तरी इँटा उद्योग व्यवसायी संघको चौथो साधारण सभा एवं दोस्रो जिल्ला सम्मेलनको शनिबार राजविराजमा उद्घान गर्दै मन्त्री अलीले यस्तो कुरा बताएका हुन् ।
‘इँटा उद्योग व्यवसायीहरुको एक प्रतिनिधी मण्डल मन्त्रालय आउनुस, समस्याबारे हामी बसेर छलफल ग¥छौं र समाधानको बाटो पहिल्याउँछौं’ मन्त्री अलीले भने ।
उद्घाटन सत्रमा बोल्दै इँटा उद्योगीहरुले इँटाको बिक्री भइनरहेको र बैंकलाई व्याज तिर्नुपर्ने बाध्यता भइरहेको सुनाए ।
सप्तरी इँटा उद्योग व्यवसायी संघका सल्लाहकार रामअबतार यादवले सडकमा निर्माण भइरहेको नालाहरुमा इँटाको प्रयोग नगरी कंक्रिट मात्रै प्रयोग गरिएको बताए ।
उनले कृषि विश्वविद्यालयको भवन निर्माण पनि बिना इँटाको भइरहेको बताउँदै राज्यले इँटा बिक्रीलाई प्राथमिकता नदिएको बताए ।
इँटा उद्योग व्यवसायी महासंघ, मधेश प्रदेशका अध्यक्ष बिक्रम साहले इँटाको प्रयोग निर्माण व्यवसायीले घटाउन लागेको बताउँदै कंक्रिटको मात्र प्रयोगले पानीको लियर घटिरहेको बताए ।
उनले मधेशमा ७०० इँटा उद्योग भएपनि अहिले २५६ वटा मात्रै संचालनमा रहेको र राज्यले कुनै चासो नदिँदा अझ घट्ने संघारमा रहेको बताए ।
सप्तरी इँटा उद्योग व्यवसायी संघका अध्यक्ष दुर्गानन्द साहको अध्यक्षतामा आयोजित कार्यक्रममा कोशी प्रदेश इँटा उद्योग व्यवसायी महासंघका सल्लाहकार, रमेश भगत, नेपाल पत्रकार महासंघ, सप्तरीका अध्यक्ष श्रवणकुमार देव, पूर्व अध्यक्षद्धय बैद्यनाथ झा र धिरेन्द्र प्रसाद साह, हेवी इक्वेन्मेन्ट संघका सचिव प्रधुम्न चौधरीसहितकाले मन्तव्य व्यक्त गरेका थिए ।
