राजविराज । जंगली वन्यजन्तु बँदेल मार्ने उच्च ओहोदाका व्यक्ति सप्तरीबाट समातिएका छन् । पक्राउ पर्नेमा नेपाल प्रहरीका पूर्व प्रहरी नायव महानिरीक्षक (डीआइजी) देखि पूर्व उपसभामुखका छोरासम्मका व्यक्ति छन् ।
सप्तरी प्रहरीका अनुसार जिल्लाको हनुमाननगर कंकालिनी नगरपालिका वडा नम्बर १ कोशी व्यारेज क्षेत्रमा बँदेल मारेर ट्रैक्टरमा लोड गरी लैजाने क्रममा उनीहरुलाई नियन्त्रणमा लिइएको हो । उनीहरुलाई बुधबार मध्यराती उक्त ठाउँबाट नियन्त्रणमा लिइएको सप्तरी प्रहरीका प्रबक्ता एवं डीएसपी ढुण्डीराज न्यौपानेले बताए ।
पक्राउ पर्नेमा नेपाल प्रहरीका पूर्व डिआईजी सुनसरीको इटहरी उपमहानगरपालिका २ बस्ने ज्ञानविक्रम शाह, प्रहरी नायव निरीक्षक सञ्जय न्यौपानेसहितका छन् ।
यस्तै, पूर्व उपसभामुख गंगाप्रसाद यादवका छोरा हनुमाननगर कंकालिनी नगरपालिका–८ निवासी आकाश बहरखेर यादव, नगरपालिकाको वडा नम्बर २ का जर्नादन राउत, वडा नम्बर ५ का ओमशंकर प्रसैला, वडा नम्बर १ का लक्ष्मण मण्डल, वडा नम्बर ३ का शंकर खिडहरी यादव, तिरहुत गाउँपालिका वडा नम्बर २ का लक्ष्मण मण्डल, राजविराज नगरपालिका वडा नम्बर ७ का रविन दास र इटहरी–२ का प्रदीप लिम्बुलाई पक्राउ गरिएको न्यौपानेले बताए ।
स्थानीयका अनुसार पूर्व डिआइजी शाह र वहालवाला सई न्यौपाने लामो समयदेखी कोसीव्यारेज क्षेत्रमा हतियारसहित शिकार खेल्न आउने गरेका थिए ।
न्यौपानेका अनुसार उनीहरुले को २ त ६९ नम्बरको ट्याक्टरमा गोली हानी मारिएको बंँदेल लोड गरेर प्र ३ – ०१– ०२२ च ६८५५ नम्बरको स्कारपियोमा फर्किने क्रममा उनीहरुलाई पक्राउ गरेको हो ।
पक्राउ परेकाहरुको साथबाट २२ क्यालिवरको राइफल १ थान, म्यागजीन २ थान, गोली १५ राउण्ड, वाइनाकुलर ३ थान, ट्राइपोर्ट १ थानलगायतका हातहतियार बरामद भएको प्रहरीले जनाएको छ ।
अबैध गाँजा तस्करी भईरहेको सूचना पाएपछि त्यस क्षेत्रमा प्रहरी खटिएका प्रहरी टोलीले उनीहरुलाई नियन्त्रणमा लिएको हो ।
यसबारेमा अन्य अनुसन्धान भइरहेको प्रहरीले जानकारी दिएको छ ।
