राजविराज । राजविराज नगरपालिका-९ बाट बरामद भएको गाँजा तथा अन्य सामग्रीको सम्बन्धमा गहिरो अनुसन्धान गर्न सप्तरी युथ नेपालले माग गरेको छ ।
प्रमुख जिल्ला अधिकारी भोला दाहाललाई बुधबार ज्ञापन बुझाउँदै यस्तो माग गरेको हाे । बरामद भएको लागूऔषध गाँजा र तस्करीका सामान ओहोरदोहोर कार्यमा संलग्न व्यक्ति वा समूहलाई कानुनी दायरामा ल्याउन माग गरिएको छ ।
‘यस घटनाले जिल्लामा संगठित, अपराधिक गतिविधि मौलाउँदै गएको स्पष्ट संकेत गर्दछ । जसले समाजमा गम्भीर असर पार्ने निश्चित छ’ ज्ञापनमा भनिएको छ, ‘त्यसैले संलग्न व्यक्ति वा समूहलाई कानुनी दायरामा ल्याउन जरूरी छ ।’
संस्थाका कावा अध्यक्ष मोहन यादवले बुझाएको ज्ञापनमा बोर्डर क्षेत्रमा अवैध कारोबार रोक्न सुरक्षा चेकपोस्टहरूको निगरानी थप कडा गर्न, निष्पक्ष छानबिन गरी सुरक्षा निकायमा लापरबाही देखिएका प्रहरी इन्चार्जहरूलाई तत्काल निलम्बन गर्न, यस्ता घटनाहरू दोहोरिन नदिन सीमा सुरक्षा नीति थप प्रभावकारी रूपमा कार्यान्वयन गर्न माग गरिएको छ ।
मागहरू तत्काल कार्यान्वयन नगरिए सप्तरी युथ नेपाल बाध्य भएर चरणबद्ध आन्दोलनमा उत्रने चेतावनी दिइएको छ ।
