राजविराज । निर्माण कम्पनीका प्रतिनिधीहरुको एउटा बहाना हुन्छ, भुक्तानी नै पाइएन, काम कसरी अगाडि बढाउनु ?’
तर, भुक्तानी पाएर पनि काम अलपत्र गर्ने निर्माण कम्पनीहरुको संख्या बढ्दै गएको छ । जसको ज्वलन्त उदाहरण बनेको छ सप्तरीको शम्भुनाथ नगरपालिका ।
यो नगरपालिकाको वडा नम्बर १० मा १५ शैय्याको नगर अस्पताल निर्माणाधीन छ । अस्पतालको यो भवन बनाउने ठेक्का एमबी टेक्नो जय शम्भो जेभी कम्पनीले लिएको छ । यो कम्पनीले पहिलादेखि नै काम लथालिङ्ग पारेपनि नगरपालिकाले गत जेठ ८ गते मिलोमतोमा १ करोड २५ लाख भुक्तानी दिएको छ ।
अस्पताल निर्माण गर्न यसअघि नै नगरपालिकाले २०८१ साल असार १७ गते निर्माण कम्पनीसँग सम्झौता गरेको थियो । भ्याटसहित कुल २३ करोड ९ लाख ७५ हजार ८९५ रुपैयाँमा ठेक्का कबोल गरेको निर्माण कम्पनीले मोविलाइजेसन वापत यसअघि पनि १ करोड ८८ लाख भुक्तानी पाएका थिए । तर, कम्पनीले अहिले खाल्डो खनेर छड ओछ्याउनेबाहेक कुनै काम नगरेको पाइएको छ । काम अलपत्र पार्दा उक्त फलामे छडमा खिया लागिसकेको अवस्थामा कारबाही बढाउनुको साटो मिलेमतोमा नगरपालिकाले थप १ करोड २५ लाख रुपैयाँ ठेकेदारलाई भुक्तानी दिए ।
यो भुक्तानी पाउँदा समेत ठेकेदारले काम अघि नबढाएको वडा अध्यक्ष धर्मेन्द्र भनिने रमाकान्त मण्डलले बताए । ‘रकम पाएपछि काम अघि बढाउनुप¥थ्यो, ‘उनले भने, ‘यसमा भुक्तानी दिने नगरपालिकाका कावा मेयर र प्रमुख प्रशासकीय अधिकृत दोषी हुन् ।’
निर्माण कम्पनीले भुक्तानी पाएको तीन महिनाअघि देखि नै काम अवरुद्ध गरेका थिए । भुक्तानी पाएको डेढ महिना बित्न लाग्दा पनि काम शुरु गरिएको छैन् ।
अस्पताल भवनको काम शुरु गराउन आफूले पटक–पटक भन्दै आएपनि आफू समेतलाई कुनै जानकारी नदिएको वडा अध्यक्ष मण्डलको भनाई छ ।
यो भुक्तानी प्रकरणमा नगरपालिकाका कावा मेयर अनिता चौधरीका सल्लाहकार अनिल भगतले २५ लाख रुपैयाँ आर्थिक लाभ लिएको दावी गर्दै स्थानीय विभिन्न राजनीतिक दलका प्रतिनिधिहरुले छानबिनको माग समेत गरेका छन् । उनीहरुले गत ५ असारमा प्रमुख जिल्ला अधिकारी भोला दाहाललाई ज्ञापन पत्र बुझाउँदै छानबिन गरी दोषीमाथि कार्वाहीको माग गरेका छन् ।
स्थानीय बासिन्दाले यसलाई भ्रष्टाचारको उपज भन्दै आक्रोश प्रकट गरेका छन् ।
अस्पताल निर्माणको विषयमा भएको ढिलाइले स्थानीय बासिन्दामा ठूलो निराशा पैदा गरेको वडा अध्यक्ष मण्डल बताउँछन् । शम्भुनाथका एक स्थानीयले भने, ‘हामीले यो अस्पतालको लागि लामो समयदेखि पर्खाइमा थियौं । तर ठेकेदारले काम नगर्दा हाम्रो लगानी र आशा दुबै चकनाचुर भएको छ ।’
स्थानीयहरुले प्रमुख जिल्ला अधिकारीले यथाशीघ्र सकरात्मक पहल गर्नुपर्ने बताएका छन् ।
अस्पताल निर्माण कार्यको ढिलाइले बासिन्दा र राजनीतिक दलका प्रतिनिधिहरूलाई थप सशंकित बनाएको छ । स्थानीयले ठेकेदार दीपक कार्की र सम्बन्धित प्रमुख प्रशासकीय अधिकृत हरि मोहन सुतिहारलाई तत्काल कारवाहीको माग गरेका छन् ।
यस बिषयमा बुझ्न खोज्दा कार्की र सुतिहार कोहि पनि सम्पर्कमा आएनन् ।
