राजविराज । सीमान्तकृत महिलाले नेपाल प्रहरीमा जागिर खाने अपेक्षा देखाएकी छन् ।
एफसिडिओको आर्थिक सहयोगमा यूएन ओप्सद्वारा सञ्चालित सुरक्षा तथा न्याय कार्यक्रम अन्तर्गत दलित सरोकार मञ्च नेपालको समन्वयमा सोमबार सप्तरीको कंचनरुप नगरपालिकामा आयोजना गरिएको अन्तरक्रिया कार्यक्रममा सीमान्तकृत महिलाले नेपाल प्रहरीमा जागिर खाने अपेक्षा राखेकी हुन् ।
कार्यक्रममा सहभागी ६० भन्दा बढी महिलाले नेपाल प्रहरीको सहायक निरीक्षक असई बन्ने आफूहरुको सपना रहेको बताइन् । प्रविणता प्रमाण पत्र तह अध्ययन गरेकी ती महिलालाई नै लक्षित गरी यो कार्यक्रमको आयोजना गरिएको यूएन ओप्सका प्रतिनिधि आलोक ठाकुरले बताए ।
कंचनरुप नगरपालिकामा योग्य महिलाको पहिचान तथा छनौट प्रक्रिया शुरु गरिएको बताउँदै उनले भने, ‘अन्तरक्रिया कार्यक्रम तयारी कक्षा सुरु गर्ने उद्देश्यले नभई तयारी कक्षामा सहभागी हुन सक्ने योग्य महिलाहरूको पहिचान तथा छनौट गर्ने पूर्व कार्यका रूपमा गरिएको हो ।’
मधेश प्रदेशमा ३० लाखभन्दा बढी महिला जनसंख्या रहे पनि मधेश प्रदेशमा प्रहरी सेवामा महिला सहभागिता २७५ देखि ३०० जना मात्र रहेको उल्लेख गर्दै उनले सिमान्तकृत महिलाहरूको न्यायमा पहुँच कमजोर रहेकोमा चिन्ता व्यक्त गरे ।
इलाका प्रहरी कार्यालय कञ्चनपुरका प्रहरी निरीक्षक लेखबहादुर विष्टले कार्यक्रमलाई प्रयोगात्मक बनाउँदै लैङ्गिक हिंसा, घरेलु हिंसा, साइबर अपराध तथा सम्बन्धित कानुनी व्यवस्थाहरूको विस्तृत जानकारी गराए । उनले नेपाल प्रहरीमा भर्ती प्रक्रिया, लोक सेवा आयोगको परीक्षा ढाँचा, आवश्यक शारीरिक मापदण्ड, उचाइँ, तौल, दौड, सहनशक्तिका साथै शैक्षिक पाठ्यक्रम (सिलेबस) बारे जानकारी गराएका थिए ।
यूएनओप्सकी प्रतिनिधि सीमा सिंहले सहभागी महिलाहरूमध्येबाट लिखित तथा शारीरिक परीक्षणका आधारमा उत्कृष्ट प्रदर्शन गर्ने ३० जनालाई तीन महिनाको आवासीय तयारी कक्षामा सहभागी गराइने जानकारी दिइन् । दलित सरोकार मञ्च नेपालका कार्यकारी निर्देशक भोला पासवानले विशेषगरी मधेसी दलित, पहाडी दलित, मुस्लिम, थारु—महिलाहरूलाई प्रहरी सेवामा औपचारिक रूपमा सहभागिता गराउने दीर्घकालीन प्रयास भएको बताए ।
