दिपेश जोशी
राजविराज । अदालतको आदेश विपरित बिना अनुमतिको माथिल्लो कक्षा बन्द गराइएपनि पुनः चलाएको पाइएपछि कार्वाही प्रकृया अगाडि बढाइएको छ ।
१९ बैशाखमा उच्च अदालत राजविराजले अनुमति पाएको भन्दा माथिल्लो कक्षा नचलाउन आदेश दिएपछि शिक्षा विकास तथा समन्वय इकाईको अगुवामाईमा सप्तरीमा निरन्तर अनुगमन हुँदै आएको छ । अनुगमनका क्रममा बिना अनुमतिका माथिल्लो कक्षा नचलाउने नगर्ने लिखित हस्ताक्षर गरेका नीजि विद्यालयका संचालकहरुले पुनः कक्षा संचालन गरेको पाइएपछि कार्वाही प्रकृया अघि बढाइएको हो ।
बुधबार जिल्लाको हनुमाननगर कंकालिनी नगरपालिका पुगेको अनुगमन टोलीले ९ वटा नीजि विद्यालयलाई कार्वाहीको प्रकृया अगाडि बढाएको छ ।
यसअघि अनुमति बिनाको माथिल्लो कक्षा बन्द गर्ने भनेर आफैं हस्ताक्षर गरेका विद्यालयले पुनः सोही कक्षा संचालन गरेको पाइएपछि कार्वाहीको प्रकृया अघि बढाइएको जिल्ला शिक्षा समन्वय इकाईका प्रमुख शशी यादवले जानकारी दिए ।
उनका अनुसार अनुमति नलिएका माथिल्लो कक्षाका सबै रजिष्टर नियन्त्रणमा लिइएको छ । रजिष्टर नियन्त्रणमा लिएपछि अब संचालकलाई कानुन बमोजिम कार्वाहीका लागि सम्बन्धित निकायमा लेखी पठाउने उनले बताए । ‘बन्द नगरिए अब कानुन अनुसार कार्वाही हुन्छ’ उनले भने ।
बुधबार हनुमाननगर कंकालिनी नगरपालिकास्थित शिक्षादीप बोर्डिङ्ग स्कुलले २ कक्षाको अनुमति लिई ५ सम्म, गौतम बुद्ध आइडियल स्कुलले पूर्व प्राथमिक तहको अनुमति लिएर ५ सम्म, ग्रीनलैण्ड इंगलिस एकेडेमीले १ सम्म अनुमति लिएर ४ सम्म, आरपी मेमोरियलले १ को अनुमति लिएर ७ सम्म, आनन्द प्राइभेट एजुकेशनल गुठीले १ को अनुमति लिएर कक्षा ८ सम्म, ब्राइट फ्युचर एकेडेमीले बिना अनुमतिको ३ कक्षासम्म, बजरंग इंगलिस बोर्डिङ्ग स्कुलले कक्षा १ को अनुमति लिएर ६ सम्म, जय बाबा धर्मराज इंगलिस बोर्डिङ्ग स्कुलले पूर्व प्राथमिक तहको अनुमति लिएर ४ तथा वैष्णेदेवी बोर्डिङ्ग स्कुलले १ को अनुमति लिएर ८ सम्म संचालन संचालन गर्दै आएकोमा अनुगमन टोलीले यसअघि नै बन्द गर्न भनिसकेको थियो ।
बन्द गर्ने भनेर आफैं हस्ताक्षर गरेको आनन्द प्राइभेट एजुकेशनल गुठीले हनुमाननगर बजारमा अर्कै कोठामा अनुमति बिनाको माथिल्लो कक्षा संचालन गरेको पाइएको अनुगमन टोलीले जनाएको छ ।
बन्द गर्ने भन्दै पुनः संचालन गरेको पाइएपछि यी माथिल्लो कक्षाका रजिष्टर नियन्त्रणमा लिइएको यादवले बताए ।
अर्काे विद्यालयमा इमिस भरेर यी विद्यालय संचालकहरुले नीजि विद्यालय संचालन गर्दै आएका छन् ।
इकाई प्रमुख यादवले यी विद्यालयका संचालकलाई कार्वाहीको प्रकृयामा लग्ने बताए ।
प्रमुख जिल्ला अधिकारी भोला दाहालले पटक–पटक अनुगमनमा जाँदा अनुमति बेगरका कक्षा संचालन नगर्न भन्दा पनि अटेर गरेकाले सम्बन्धित निकायले कानुन बमोजिम कार्वाहीको प्रकृया अघि बढाउने बताए ।
