राजविराज । नव आगन्तुक प्रहरी उपरीक्षक गौतम कुमार केसीले सप्तरीबाट भागेर जानुनपराेस् भनी कामना गरेका छन् ।
सप्तरी उद्योग वाणिज्य संघले आयाेजना गरेको सम्मान ग्रहण कार्यक्रमलाई सम्बोधन गर्दै केसीले भने, ‘सप्तरी जिल्लाबाट भाग्नु नपरोस्, नभगाइयोस । म भाग्न नपरोस् । विभिन्न ढंगले म यसरी नै यहाँबाट माला लगाएर सप्तरी जिल्लाबाट विदा हुन चाहन्छु । त्यसका लागि सम्पूर्ण कामहरू गर्न तयार छु ।’
एसपी केसीले आफू पहाडको मान्छे भएकाले नहेप्न पनि आग्रह गरे । ‘म पहाडको मान्छे हो भनेर नहेपियोस’ उनले भने, ‘म पनि यहीँको उपभोक्ता हो । यहीँ काम गर्न आएको छु ।’
उनले हप्ता, मासिक उठाउन नआएको बताए । ‘मेरो बैंक खाता पनि देखाइदिन्छु । एउटा सुट्केस बोकेर आए त्यहीँ मात्र बोकेर फर्किने हो’ उनले भने ।
गैर कानुनी क्रियाकलाप नियन्त्रण गर्ने दायित्व प्रहरीको भएको र प्रहरीले इमान्दारीपुर्वक काम गरिरहेको बताउँदै उनले यसमा सबैले सहयोग गर्नुपर्ने बताए ।
सप्तरी उद्योग वाणिज्य संघका अध्यक्ष लालु प्रसाद अग्रवालले खुल्ला सिमानाका कारण व्यापार चौपट भैरहेकाले यसमा सहयोग गरिदिन आग्रह गरे ।
मेड इन नेपाल लेखेको सामान प्रहरीले समातेमा वास्तविक छानबिन गरिदिन समेत उनले आग्रह गरे ।
सम्मान कार्यक्रममा नेपाल पत्रकार महासंघ सप्तरीका अध्यक्ष श्रवण कुमार देव, मधेश प्रदेशका उपाध्यक्ष अम्बिका दाहाल, निर्माण व्यवसायी संघ सप्तरीका पूर्व अध्यक्ष रामअशिष साहसहितकाले शुभकामना व्यक्त गरेका थिए ।
