राजविराज । सप्तरीको शिक्षा क्षेत्रका अग्रणी व्यक्ति डा. पंचदेव यादवको दोस्रो पुण्यतिथी मनाइएको छ ।
स्व. यादवले स्थापना गरेको राजविराज २ स्थित ज्ञानज्योति इंगलिस बोर्डिङ्ग स्कुलमा बिहीबार उनको पुण्यतिथी मनाइएको हो ।
कार्यक्रममा प्याव्सन अन्तर्गतका सप्तरीका ३२ विद्यालयबाट एसईईमा उत्कृष्ट अंक ल्याउने छात्रछात्रालाई पुरस्कृत गरिएको छ । उनीहरुलाई रु ५०० नगदसहित खादा र प्रमाण पत्रसहित छात्रछात्रालाई सम्मान गरिएको हो ।
एसईईमा ४ जिपिए ल्याउनेलाई चाँदीको मेडल समेत प्रदान गरिएको प्याव्सन सप्तरीका अध्यक्ष उग्रकान्त झाले जानकारी दिए ।
स्व. यादवका पत्नी सुशिलादेवी यादवको अध्यक्षतामा आयोजित कार्यक्रमका बक्ताहरुले यादवको निधनले शिक्षा क्षेत्रमा ठूलो क्षति भएको बताउँदै उहाँको नाम जीवन्त राख्नुपर्ने जरुरी रहेको बताए ।
कार्यक्रममा पूर्व प्रमुख निर्वाचन आयुक्त डा. अयोधी प्रसाद यादव, शिक्षा विकास तथा समन्वय इकाईका प्रमुख शशी यादव, राजविराज नगरपालिकाका शिक्षा शाखा प्रमुख भोगेन्द्र यादव, प्याव्सन सप्तरीका अध्यक्ष उग्रकान्त झा, नेपाली कांग्रेसका उप सभापति रामकुमार यादवसहितकाले स्व. यादवको योगदानको बिषयमा चर्चा गरेका थिए ।
सप्तरी प्याव्सनका दुई कार्यकाल अध्यक्ष रहीसकेका यादवको २०८० साल जेठ ३ गते सबारी दुर्घटनामा परेका थिए । करिब डेढ महिनाको उपचारपछि समेत उनको निधन भएको थियो ।
महेन्द्र बिन्देश्वरी बहुमुखी क्याम्पसमा प्राध्यापन पेशामा संलग्न उनी नेपाल राष्ट्रिय प्राध्यापक संघ मधेश प्रदेशका अध्यक्ष, प्याब्सन मधेश प्रदेशका प्राज्ञिक सल्लाहकार, मैथिली साहित्य परिषद्का एवं सामुदायिक सेवा केन्द्रका आजीवन सदस्य समेत रहेका थिए ।
