राजविराज । सप्तरीको एकै परिवारका दाजुभाई नै लागूऔषध गाँजा तस्करीमा लागेको खुलेको छ ।
जिल्लाको हनुमाननगर कंकालिनी नगरपालिका वडा नम्बर १ भारदह निवासी दाजुभाई गाँजा तस्करीमा लागेको पाइएको हो । गाँजा तस्करी गर्ने दाजु बुधन भनिने जोगानन्द मण्डल नेपालमा पक्राउ परिसकेका छन् भने भाई अभिषेक मण्डल भारतमा पक्राउ परेका छन् ।
२४ बर्षीय अभिषेकसहित सोही ठाउँका २८ बर्षीय राजेश मण्डल र भारतको बिहार राज्य अन्तर्गत बलुवा थाना क्षेत्र निर्मली पंचायत–१ रामपुर निवासी ३० बर्षीय दशरथ सिंह पूर्वी कोशी तटबन्धबाट पक्राउ परेका हुन् ।
एमएल ५ एल २७६९ नम्बरको कारबाट नेपाल हुँदै भारततर्फ गाँजा लग्दै गरेको विशेष सूचनाको आधारमा भारतको भीमनगर प्रहरी टोलीले उनीहरुलाई पक्राउ गरेको हो । उनीहरुको साथबाट १८२ दशमलव ३६० किलोग्राम गाँजा बरामद भएको भीमनगरका थानाध्यक्ष दीपक कुमारले बताएका छन् ।
अभिषेकका दाजु जोगाानन्द नेपालकै चर्चित गाँजा तस्कर हुन् । पछिल्लो पटक उनलाई सप्तरी प्रहरीले १ असारको राति इलाका प्रहरी कार्यालय भारदह अगाडिबाट प्रहरीले नियन्त्रणमा लिएको छ ।
१४ पुस २०७९ मा कोशी व्यारेजको गोल घरदेखि अन्दाजी ५०० मिटर उत्तर पूर्व कोशी भंगालोको पूर्व टापुको एकान्त ठाउँमा बालुवाभित्र गाँजा भेटिएको थियो । बालुवामा खाल्डो खनी २७ वटा बोरामा वटा बोरामा राखिएको ८१० किलो गाँजा प्रहरीले बरामद गरेको थियो ।
भेटिएको गाँजाको अनुसन्धानका क्रममा मण्डललाई पक्राउ गरिएको हो ।
लागूऔषध गाँजा मुद्दामा पछिल्लो पटक पक्राउ परेका बुधन भनिने जोगानन्द मण्डलबिरुद्ध यसअघि ७ वटा मुद्दा दर्ता रहेको सप्तरी प्रहरीको भनाई छ ।
