राजविराज । प्रहरीको गोली लागेर सप्तरीको राजगढ गाउँपालिकाका लालु यादवको मृत्यु भएपछि गठन भएको संघर्ष समितिले घटनाको उच्चस्तरीय छानबिन समिति बनाउन माग गरेको छ ।
आज प्रमुख जिल्ला अधिकारी भोला दाहाललाई ज्ञापनपत्र बुझाउँदै समितिले यस्तो माग गरेको हो । लालुको मृत्यु भएपछि जिल्ला प्रशासन कार्यालयमा बसेको सर्वदलीय सर्वपक्षीय बैठकले उच्चस्तरीय छानबिन बनाउने सहमति भएको स्मरण गराउदै ज्ञापनमा घटना भएको १३ दिन बितिसक्दा समेत समिति नबनेको उल्लेख गरिएको छ ।
समितिका संयाेजक दिपेन्द्र यादवले बुझाएको ज्ञापनमा नेपाल सरकार गृह मन्त्रालयका सह सचिब वा मधेस प्रदेश मन्त्रालयका सह सचिव को नेतृत्व मा सर्व पक्षिय छानबिन समिति बनाउन माग गरिएको छ ।
घटनाको नेपाल प्रहरीका एसएसपीको नेतृत्वमा छानबिन गरिएको छ । तर समितिले यो मानेको छैन । प्रहरी नेतृत्व बाहेक को उच्चस्तरीय छानबिन समिति भदौ ५ गते भित्र गठन गर्न माग गरिएको छ । अन्यथा भदौ ८ गतेदेखि चरणबद्ध आन्दोलन गरिने चेतावनी दिइएको छ ।
