राजविराज । झण्डै डेढ महिनादेखि हराइरहेका सप्तरीका एक व्यक्ति राैतहटमा मृत भेटिएका छन् ।
जिल्लाकाे खडक नगरपालिका ३ बस्ने अन्दाजी बर्ष ५८ को उपेन्द्र भगत राैतहट सदरमुकाम गाैरमा मृत भेटिएका हुन् ।
राजविराज नगरपालिका ८ स्थित श्याम बाबा राईस एण्ड आयल मिल प्रालिका म्यानेजर समेत रहेका भगत २५ असारदेखि बेपत्ता थिए ।
उनी गौर नगरपालिका वडा नं. ५ स्थित नेपाल लजको २०२ नम्बर कोठामा साेमबार मृत भेटिएका हुन ।
दुई खाटको बिचमा तल भुईमा लडेको तथा मुखबाट रगत आएको अवस्थामा उनी मृत भेटिएको रौतहट प्रहरीले जनाएको छ ।
मृतकको शवमा बाहिरी चोटपटक केही नदेखिएको र थप अनुसन्धान भइरहेको जिल्ला प्रहरी कार्यालय रौतहटका प्रमुख एसपी नेत्रमणी गिरीले जानकारी दिए ।
उद्योगमा लिखित वा मौखीक कुनै जानकारी नगराई एक्कासी वेपता भएपछि उद्योगका प्रोप्राइटर लालु अग्रवालले खाेजी गरिदिन प्रहरीमा उजुरी दिएका थिए ।
