राजविराज । पुरानो निर्णय कार्यान्वयन गर्ने सहमति भएपछि राजविराजमा भएको हिन्दु-मुश्लिम विवाद समाधान भएको छ ।
राजविराज नगरपालिका वडा नम्बर २ गुलाव ग्यारेज अगाडिको जग्गामा दुई समुदायबीच विवाद भएको थियो । हिन्दु समुदायले उक्त जग्गामा दीपावली पर्व मनाउन भन्दै बजरंगबलीकाे झन्डा गाडेपछि मुश्लिम समुदायले विवाद गरेका थिए । मुश्लिम समुदायले आफुहरु उक्त जग्गामा मोहररम पर्व मनाउँदै आएको र धार्मिक भावनामा चोट पुगेको भन्दै रोक्न जाँदा दुबै पक्षबीच झडप नै भएको थियाे ।
एलानी जग्गा भएको याे ठाउँमा मुश्लिम समुदायले मोहररम पर्व मनाउदै आएकोमा गत असारमा स्थायी संरचना निर्माण गरेको थियो । राजविराज नगरपालिकाले मुश्लिम समुदायका लागि संरचना निर्माण गरिदिएपछि त्यस बेला हिन्दु समुदायले बिराेध गरेकाे थियाे ।
हिन्दुकाे विरोध गरेपछि जिल्ला प्रशासन कार्यालयमा बसेको सर्वदलीय सर्वपक्षीय बैठकले उक्त स्थायी संरचना हटाउने निर्णय भएको थियो ।
२० असारमै भएको यो निर्णय भने अहिलेसम्म कार्यान्वयन भएको थिएन ।
मंगलबार भएकाे झडपपछि पुनः जिल्ला प्रशासन कार्यालयमा बसेको सर्वदलीय, सर्वपक्षीय बैठकले २० असारको निर्णय कार्यान्वयन गर्ने निर्णय भएको छ । बैठकले २२ असोज बुधबारसम्म उक्त संरचना हटाउने निर्णय गरेको छ । हटाउने जिम्मेवारी राजविराज नगरपालिकालाई दिइएको छ ।
उक्त ठाउँमा अन्य व्यक्तिहरूले राख्दै आएको सबारीसाधन आफैं हटाउने निर्णय बैठक्ले गरेको छ ।
यस्तै, बैठकले हिन्दु समुदायले पनि उक्त ठाउँमा लक्ष्मी पूजा नगरी अर्को ठाउँमा गर्ने निर्णय भएको छ । यो जग्गामा कुनै पनि धर्म सम्प्रदाय झल्किने झण्डा पनि नराख्ने निर्णय भएको छ ।
यी निर्णयपछि दुबै पक्षबीच सहमति भै विवाद समाधान भएको प्रमुख जिल्ला अधिकारी टुवराज पोखरेलले जानकारी दिए ।
