राजविराज । दशैं जस्तो चाडमा समेत तलव नदिएको भन्दै शिक्षकहरुले सप्तरीको खडक नगरपालिकामा तालाबन्दी गरेका छन् ।
४ महिनासम्म तलव नदिई भोको पेटले काम गर्न बाध्य बनाएको भन्दै उनीहरुले नगरपालिका कार्यालयको मूल गेटमा ताला लगाएका हुन् । ताला लगाउँदै उनीहरुले पठनपाठन ठप्प गरी बिहीबारदेखि नगरपालिकामै धर्ना दिने बताएका छन् ।
२ असोजमा आफूहरुले तलव, भत्ता माग गर्दै बिरोध गरेपछि सोही दिन बसेको कार्यपालिकाको बैठकले तलव निकासा गर्न प्रमुख प्रशासकीय अधिकृतलाई आर्थिक कारोबार गर्न अख्तियारी दिने निर्णय गरेको शिक्षकहरुले विज्ञप्तीमा बताएका छन् ।
उक्त अख्तियारी नदिएपछि आफूहरु पुनः ७ असोजमा जिल्ला प्रशासन कार्यालयमा समेत जानकारी गराएको उनीहरुले बताएका छन् ।
भोको पेट र निसासिएको आत्मालाई सम्पूर्ण न्यायप्रेमी अभिभावक, बुद्धिजिवी, विद्यार्थी, कर्मचारी, जनप्रतिनिधीले सहयोग गर्ने विश्वास व्यक्त गर्दै शिक्षकहरुले विज्ञप्तीमा भनेका छन् ‘आफूहरुको आन्दोलनबाट सेवाग्राहीमा पर्न जाने असुविधाप्रति खडक नगरपालिका नै जिम्मेबार रहेको स्मरण गराउन चाहन्छौं ।’
संघीय मामिला तथा सामन्य प्रशासन मन्त्रालय, शिक्षा विभान तथा प्रविधी मन्त्रालय र जिल्ला प्रशासन कार्यालयलाई बाेधार्थ राखेर शिक्षकहरुले विज्ञप्ती जारी गरेका छन् ।
