राजविराज । समय : २७ असोजको बिहान ३ः३० बजे ।
स्थान : सप्तरीको रुपनी गाउँपालिका वडा नम्बर ६ बिरेन्द्र बजार ।
सबै मस्त निन्द्रामा सुतिरहेका थिए । स्थानीय रजनीश यादव ट्रक लिएर निस्किने क्रममा थिए । त्यहीं बेला उनको नजर छिमेकी बिनय भगतको घर अगाडि पर्यो । जहाँ भगतको स्करपियो चोरीको प्रयास भइरहेको थियो ।
भगतले आफ्नो घर अगाडि पार्किङ्ग गरेका स. १ च ७१३ नम्बरको स्करपियो गाडी चोरीको प्रयास भइरहेको थियो ।
स्करपिओको झ्यालको सीसा फुटाएर त्यसभित्र राखिएको चावी निकाली व्याट्री डाउन रहेको स्करपिओलाई स्टार्ट गर्न नजिकै राखिएको पिकअप गाडीको व्याट्री खोलेर त्यसमा लगाएर स्टार्ट गर्न खोजिएको थियो ।
दुई जना युवा मिलेर स्करपियो चोर्न खोजेको देखेपछि उनले हल्ला गरे । लगत्तै अन्य स्थानीयहरु जम्मा भए र चोर्न खोजेका दुबै युवालाई नियन्त्रणमा लिए ।
नियन्त्रणमा लिएका युवालाई स्थानीयले इलाका प्रहरी कार्यालय रुपनीमा बुझाए ।
पक्राउ पर्ने हुन्–सिरहाको विष्णुपुर गाउँपालिका वडा नम्बर ४ बस्ने २५ बर्षीय अमन यादव र निजकै भाई २१ बर्षीय सुमन यादव ।
यी दुई जना पक्राउ परेपछि प्रहरीले अनुसन्धान शुरु गर्यो । त्यस क्रममा पत्ता लाग्यो अमन यसअघि प्रहरी हिरासतबाट भागेका थुनुवा हुन् ।
सप्तरी प्रहरीका प्रबक्ता एवं डीएसपी डम्बरबहादुर पुरीले अमन लागूऔषध ब्राउन सुगर मुद्दामा पक्राउ परी प्रहरी बृत्त काठमाडौंको हिरासतमा अनुसन्धानका लागि थुनामा राखिएका थिए ।
उनी जेनजी आन्दोलनका क्रममा गत भदौ २४ गते प्रहरी हिरासत कक्षबाट भागेका थिए ।
प्रहरी हिरासतबाट भागेका उनी पुनः अपराध कर्ममै लागेका थिए । तर, सप्तरीमा स्करपियो गाडी चोदै गर्दा पक्राउ परे ।
यो घट्नाले प्रहरी हिरासत र कारागारबाट भागेकाहरु अपराध कर्ममा लागेको देखिन्छ । सप्तरी प्रहरीले यस्ता व्यक्तिहरु कहीं कतै देखेको भए तत्काल जानकारी गराउन सबैसँग अनुरोध गरेको छ ।
सप्तरी प्रहरीका प्रमुख एसपी गौतम केसीले यस्ता व्यक्तिबिरुद्ध प्रहरीले सुक्ष्म तरिकाले निगरानी बढाएको बताउँछन् । ‘यसमा प्रहरीले निगरानी बढाएका छन्’ उनले भने, ‘हामी चनाखो छौं । यस्तालाई कहींकतै देखेमा सूचना उपलब्ध गराउन पनि आग्रह गर्दछु ।’
