राजविराज । सप्तरीको तिलाठी कोईलाडी गाउँपालिका वडा नम्बर ४ र ५ लाई बुधबार औपचारिक रुपमा बाल विवाह मुक्त वडा घोषणा गरिएको छ ।
बाल अधिकार संरक्षण र बाल विवाह अन्त्यको लागि समुदाय स्तरमा गरिएको दीर्घकालिन सचेतनापछि दुवै वडालाई बालविवाह मुक्त वडा घोषणा गरिएको हो ।
गाउँपालिका, वडा कार्यालय तथा सरोकारवाला निकायहरुको संयुक्त आयोजनामा भएको कार्यक्रममा तिलाठी कोईलाडी गाउँपालिकाका अध्यक्ष अरुण कुमार मण्डलले वडालाई बालविवाह मुक्त घोषणा गरे ।
त्यस अवसरमा बोल्दै उनले बाल विवाह कानुनी अपराध मात्र नभई सामाजिक विकृति पनि भएको बताए । यसको अन्त्यका लागि समुदायको निरन्तर भूमिका आवश्यक रहेको उनले बताए ।
कार्यक्रममा बाल विवाहले बालबालिकाको शिक्षा, स्वास्थ्य र समग्र विकासमा गम्भीर असर पार्ने भएकाले अभिभावक, विद्यालय र स्थानीय तहको समन्व्यमा निगरानी प्रणाली सुदृद गरिने उनले प्रतिवद्धता जनाए । बाल विवाह रोकधामका लागि सचेतना मुलक कार्यक्रमलाई नियमित र प्रभावकारी बनाइने समेत उनले बताए ।
घोषणा कार्यक्रममा तिलाठी कोईलाडी गाउँपालिका उपाध्यक्ष फुल कुमारी साह, वडा नम्बर ४ का वडा अध्यक्ष मुनिलाल मुखिया, वडा नम्बर ५ का वडा अध्यक्ष ललन प्रसाद राउत, सेभ द सप्तरीका अध्यक्ष धु्रव प्रसाद देव, तिलाठी कोईलाडी गाउँपालिकाका बाल कल्याण अधिकारी शैलेन्द्र कुमार सिंह, स्थानिय जनप्रतिनिधि, शिक्षाकर्मी, स्वास्थयकर्मी, सामाजिक अभियन्ता, कृषि समुहका प्रतिनिधि, बाल क्लबका प्रतिनिध तथा गाउँ समाजका सदस्यहरुको सहभागिता थियो ।
