राजविराज । आगामी चुनावमा प्रभावकारी रुपमा भूमिका निर्वाह, संचालन र समन्वयका लागि सप्तरीमा तीन पार्टी सम्मिलित कार्यदल गठन गरिएको छ ।
राष्ट्रिय मुक्ति पार्टी नेपाल, नागरिक उन्मुक्ति पार्टी नेपाल र जनता समाजवादी पार्टीका जिल्ला अध्यक्ष सहित जिल्लाका प्रमुख नेतागणको संयुक्त बैठकले कार्यदल गठन गर्ने निर्णय गरेको हो ।
राष्ट्रिय मुक्ति पार्टीको जिल्ला अध्यक्ष श्री दिपेन्द्र कुमार चौधरीको संयोजकत्वमा गठन भएको कार्यदलका सदस्यमा जनता समाजवादी पार्टीका अध्यक्ष सत्यनारायण मण्डल, नागरिक उन्मुक्ति पार्टीका अध्यक्ष ब्रिजेन्द्र चौधरी, जनता समाजवादी पार्टीका युवा नेता सन्तोष मण्डल, राष्ट्रिय मुक्ति पार्टीका जिल्ला सचिव बिरेन्द्र यादव, महिला नेतृ रिसु चौधरी र नागरिक उन्मुक्ति पार्टीका नेता रमाकान्त चौधरी छन् ।
आगामी चुनावलाई एउटा संघर्षको कडीको रुपमा लिने निर्णय तीन पार्टीले गरेको छ ।
यस्तै, सामाजिक आन्दोलनको सम्बन्धमा सुशासन र भ्रष्टाचार मुक्त समाज निर्माण गर्नुका साथै जिल्लाको शिक्षा, स्वास्थ्यमा सुधार तथा सप्तरी जिल्लाको वृहत्तर विकासका लागि सामाजिक आन्दोलनका कार्यक्रमहरु संयुक्त रुपमा अगाडी बढाउने निर्णय पनि गरिएको बिहीबार जारी गरिएको विज्ञप्तीमा उल्लेख छ ।
