राजविराज । व्यवसाय दर्ता प्रमाण पत्र बिना घरेलु् मदिरा बिक्री गर्नेलाई सप्तरीमा कार्वाही गरिने भएको छ ।
प्रतिनिधी सभा सदस्य निर्वाचनलाई स्वच्छ, निश्पक्ष, व्यवस्थित एवं मर्यादित तवरबाट सम्पन्न गर्न यस्तो निर्णय गरिएको छ ।
जिल्ला प्रशासन कार्यालयमा बसेको सरोकारबालाहरुको बैठकले यस्तो निर्णय गरेको हो ।
जिल्लास्थित खुद्रा मदिरा पसलहरुले व्यवसाय दर्ता प्रमाणपत्र बिना घरेलु मदिरा समेत बिक्री बितरण गरिरहेको सुचना प्राप्त भएको अवस्थामा उक्त मदिरा जफत गरी नष्ट गर्ने साथै प्रचलित कानून अमोजिम कारवाही गर्ने निर्णय बैठकले गरेको छ ।
बैठकले इजाजत प्राप्त खुद्रा तथा थोक मदिरा विक्रेताहरुले मदिरा बिक्री बितरण गर्न पाउने समय साँझ ७ बजे र होटल तथा रेष्टुरेन्टहरुमा सेवन गर्ने समय बढीमा सटर बन्द गर्ने गरी ८ः०० बजेसम्म पाउने निर्णय गरेको छ ।
यस्तै, जिल्लाको विभिन्न स्थानमा रहेको मिठाई पसलहरुमा रंगको बढी प्रयोग गरी खाने सामानहरु आकर्षित बनाइ शरीरमा हानी गरेको सन्दर्भमा मिठाइ पसलमा प्रयोग गरेको रंग खाने हो ? होइन सो यकिन गरी अत्याधिक रंग र अखाद्य रंग भएको भए जफत गरी कारवाही गर्ने निर्णय समेत भएको प्रमुख जिल्ला अधिकारी टुवराज पोखरेलले जानकारी दिए ।
सवारी साधनहरुमा समेत मिठाईको डब्बा बेच्ने कार्य भईरहेको र उक्त डब्बा मिठाईको तौल कम रहेको समेत गुरासो आएको सन्दर्भमा अनुगमनको क्रममा घुमि–घुमि तथा सवारी साधन लगायत विभिन्न स्थानहरुमा बेच्ने डब्बा मिठाईको तौल कम भएको पाइएमा प्रचलित कानून बमोजिम कारवाही गर्ने निर्णय समेत भएको उनले बताए ।
उनका अनुसार जिल्ला स्थित पान पसल, किराना पसल लगायत जेनरल स्टोरहरुमा इजाजत पत्र विना सुर्तीजन्य पदार्थको बिक्री बितरण भइरहेको जनगुनासोको सन्दर्भमा अनुगमनको क्रममा त्यस्ता पसलहरुमा विना इजाजत सुर्तीजन्य पदार्थ बिक्री बितरण भएको देखिएको खण्डमा आवश्यक कारवाहीको प्रकृया अगाडी बढाउने निर्णय भएको छ ।
सुर्तीजन्य पदार्थ (नियन्त्रण र नियमन गर्ने) ऐन, २०६८ अनुसार शिक्षण संस्था (विद्यालय, कलेज), स्वास्थ्य संस्था, बाल कल्याण गृह र क्लबहरुबाट कम्तीमा १०० मिटरको दुरी भित्र सुर्तीजन्य पदार्थ विक्री बितरण गरेको पाइएमा सोही ऐन बमोजिम आवश्यक कारवाहीको प्रकृया अगाडी बढाउने निर्णय समेत भएको छ ।
