राजविराज । नेपाली कांग्रेसका उपसभापति विश्वप्रकाश शर्माले संघीयतालाई कसैले हल्लाएर नहलिने बताएका छन् ।
नेपाली कांग्रेसद्वारा राजविराजस्थित गजेन्द्र चोकमा मंगलबार आयोजित सभालाई सम्बोधन गर्दै उनले यस्तो बताएका हुन् । संघीयता अब नहल्लिने र अझ बलियो बनाएर लग्नुपर्ने उनले बताए ।
‘कोही छन् काठमाडौंमा बसेर संघीयता चाहिँदैन भन्छन् । कोहि छन् हाम्रो तागत, बल पुगेका दिन संघीयता खारेज गछौं भन्छन्’ शर्माले भने, ‘तर नेपाली कांग्रेस पार्टी र हाम्रा अग्रजहरुको योगदानले पनि बनेको संघीयता कसैले हल्लाएर हल्दिैन् ।’
उपसभापति शर्माले कैयौं मधेश आन्दोलनमा जीवन दिएकाहरुको पनि संघीयता भएको भन्दै संघीयतालाई अझ बलियो बनाएर अघि बढ्न कांग्रेस तयार रहेको बताए ।
संघीयताका लागि कांग्ैसको पनि ठूलो भूमिका रहेको उनले बताए ।
‘कांग्रेस प्रजातान्त्रिकले संघीयतालाई डकुमेन्टमा लेख्यो, मधेश आन्दोलनले संघीयतालाई केन्द्रभागमा ल्यायो । कैयौंले जीवन गुमायो’ उनले भने, ‘यसपछि संघीयताको आवाजलाई कांग्रेसले सुन्नतिर लाग्यो ।’
गिरिजाप्रसाद कोइरालाले संघीयतालाई देशको डकुमेन्टमा समावेश गर्दै सम्झौता गरेको, सुशिल कोइराला प्रधानमन्त्री बन्दा संघीयतासहितको संविधान बनाएको र संघीयतालाई कार्यान्वयन गराउने काम शेरबहादुर देउवाको नेतृत्वमा भएको उनले उल्लेख गरे ।
शर्माले देश हाँक्ने पार्टी नै कांग्रेस भएको भन्दै पछिल्लो समय कांग्रेस नयाँ भएर आएको बताए । ‘बदलेर आएको कांग्रेसले अब देशलाई परिवर्तन गर्ने योजना बोकेर आएको छ’ उनले भने, ‘यसैले कांग्रेसलाई जिताउनु जरुरी छ ।’
शर्माले गजेन्द्रनारायण सिंहको शालिकमा मार्ल्यापण गरेका थिए । मार्ल्यापण गर्नुअघि उनी जुत्ता फुकालेर शालिक अगाडि गएका थिए ।
त्यस क्रममा उनले जय नेपाल र जय मधेशको नारा लगाएका थिए ।
उपसभापति शर्मा मंगलबारै रुपनी गाउँपालिकामा आयोजित सभालाई समेत सम्बोधन गरेका छन् ।
