राजविराज । सप्तरीको अत्यन्तै दुर्गम मानिएको क्षेत्रमा पनि सुरक्षा सतर्कता बढाइएको छ । आगामी फागुन २१ गते हुने प्रतिनिधी सभा सदस्य पदको निर्वाचनलाई मध्यनजर गर्दै जिल्लाको गोबरगाढामा पनि सुरक्षा सतर्कता बढाइएको छ ।
क्षेत्र नम्बर १ अन्तर्गत हनुमाननगर कंकालिनी नगरपालिका वडा नम्बर १३ अवस्थित गोबरगाढा गाउँ कोशी नदीको बीचमा अवस्थित छ । अति संवेदनशिलको सूचीमा रहेको यो ठाउँमा सुरक्षा बढाईएको छ ।
गोबरगाढामा डुँगा चढेर भंगालो तर्दै संयुक्त सुरक्षाकर्मीको टोलीले गस्ती गर्दै आएको छ ।
राजविराजस्थित बरख गणका नेपाली सेनाले सशस्त्र प्रहरी बल नेपाल तथा नेपाल प्रहरीको समन्वयमा संयुक्त पेट्रोल योजना गरी सुरक्षा प्रत्याभुतिको लागि गतिविधि बढाएको छ ।
जनविश्वासमा अभिबृद्धि गर्ने तथा आसन्न निर्वाचनलाई निष्पक्ष, भयरहित, शान्तिपूर्ण र व्यवस्थित रुपमा सम्पन्न गराउने उद्देश्यका साथ समन्वयात्मक र सुरक्षात्मक गतिविधिहरु निरन्तर रुपमा अघि बढाईरहेको बरख गणले जनाएको छ ।
यस प्रकारको सुरक्षात्मक पहलले निर्वाचन प्रकृयामा कुनै पनि किसिमका अवान्क्षित गतिविधि हुन नदिन सहयोग पुर्याउने विश्वास साथै स्थानीय समुदाय र सरोकारवाला निकायहरुसँगको सहकार्यमा शान्ति–सुरक्षा सुद्धृढ बनाउने कार्य निरन्तर जारी रहने बरख गणले जनाएको छ ।
यो गोबरगाढामा ४५१ पुरुष र २९७ महिला गरी ७४८ मतदाता छन् । यो ठाउँमा एक मतदान केन्द्र र एक मतदान स्थल छ ।
