राजबिराज ।
११६ औँ अन्तर्राष्ट्रिय महिला दिवसको अवसरमा “आजको समयमा महिलाको भूमिका” विषयक अन्तरक्रिया तथा प्यानल छलफल कार्यक्रम राजबिराज जेसीजको आयोजनामा सम्पन्न भएको छ। कार्यक्रम राजबिराजस्थित जेसीज भवनमा सम्पन्न भएको हो।
कार्यक्रममा प्रमुख अतिथि तथा प्यानल सदस्य मन्जु श्रेष्ठले महिलाको सहभागिता बिना समाजको समग्र विकास सम्भव नहुने बताउँदै महिलालाई शिक्षा, सीप र अवसरको पहुँच सुनिश्चित गर्न आवश्यक रहेको बताउनुभयो। महिलाले आफ्नो अधिकारप्रति सचेत हुँदै नेतृत्वदायी भूमिकामा अघि बढ्नुपर्ने उहाँको भनाइ थियो।
अतिथि तथा प्यानल सदस्य अधिवक्ता मनु खनालले महिलाका अधिकार संरक्षणका लागि कानुनी सचेतना अभिवृद्धि गर्नुपर्नेमा जोड दिनुभयो। पत्रकार अम्बिका दाहालले सञ्चारमाध्यमले महिलाको सकारात्मक योगदान र सफलताका कथालाई प्राथमिकताका साथ उजागर गर्नुपर्ने धारणा व्यक्त गर्नुभयो। अधिकारकर्मी अनिता देवकोटाले समाजमा अझै देखिने लैङ्गिक विभेद अन्त्य गर्न सबै पक्षको सहकार्य आवश्यक रहेको बताउनुभयो। राजबिराज जेसीजकी पूर्व अध्यक्ष नानी मैया कटवालले महिलालाई सामाजिक तथा नेतृत्वदायी भूमिकामा सक्रिय हुन प्रेरित गर्नुपर्ने आवश्यकता औँल्याउनुभयो।
कार्यक्रम राजबिराज जेसीज वर्ष २०२६ का अध्यक्ष जेसी रवी कुमार रायको अध्यक्षतामा सम्पन्न भएको थियो। अध्यक्ष रायले महिला सशक्तिकरण समाज विकासको महत्वपूर्ण आधार भएको उल्लेख गर्दै यस्ता कार्यक्रमहरूले महिलाको भूमिका, अवसर तथा चुनौतीबारे सकारात्मक सन्देश प्रवाह गर्ने विश्वास व्यक्त गर्नुभयो।
कार्यक्रम संयोजक जेसी मधु राय रहनु भएको थियो भने कार्यक्रम सञ्चालन जेसी रन्जना चौधरीले गर्नुभएको थियो। कार्यक्रममा विभिन्न क्षेत्रका बुद्धिजीवी, पत्रकार, समाजसेवी, विद्यार्थी तथा स्थानीय महिलाको उल्लेखनीय सहभागिता रहेको थियो। कार्यक्रमको अन्त्यमा समाजमा योगदान पुर्याएका महिलाहरूलाई सम्मान समेत गरिएको थियो।
