राजविराज । सप्तरीको हनुमाननगर कंकालिनी नगरपालिका वडा नम्बर १४ स्थित राष्ट्रिय माध्यमिक विद्यालय रम्पुरा मल्हनियाँमा बाल क्लब गठन गरिएको छ। युनाइटेड मिसन टू नेपालको साझेदारी तथा सबल नेपालको सहकार्यमा सञ्चालित शिक्षा सुरक्षा परियोजना अन्तर्गत बुधबार यो बाल क्लब गठन गरिएको हो।
ज्योति कुमारी मण्डलको अध्यक्षतामा यो समिति गठन गरिएको हो ।
विद्यालयमा बालअधिकार, बाल सहभागिता तथा बालमैत्री वातावरणलाई प्रवर्द्धन गर्ने उद्देश्यले मण्डलको नेतृत्वमा १३ सदस्यीय बाल क्लब गठन गरिएको परियोजना पक्षले जनाएको छ।
क्लबले विद्यालयमा अध्ययनरत बालबालिकाको आवाज उठाउने, नेतृत्व विकास गर्ने तथा विभिन्न सिर्जनात्मक र सचेतनामूलक कार्यक्रम सञ्चालन गर्ने अपेक्षा गरिएको छ।
कार्यक्रममा सबल नेपालका उपाध्यक्ष भुपेश कुमार साह, विद्यालयका प्रधानाध्यापक अरुण कुमार साह, शिक्षा सुरक्षा परियोजनाका कार्यक्रम संयोजक निरञ्जन यादव तथा सामाजिक परिचालकसहित सरोकारवालाहरूको उपस्थिति रहेको थियो।
उपस्थित वक्ताहरूले बाल क्लबले विद्यार्थीहरूमा नेतृत्व क्षमता विकास गर्नुका साथै विद्यालयलाई थप बालमैत्री बनाउन महत्वपूर्ण भूमिका खेल्ने विश्वास व्यक्त गरे ।
कार्यक्रम अन्त्यमा नवनिर्वाचित बाल क्लबका पदाधिकारी तथा सदस्यहरूलाई सफल कार्यकालको शुभकामना दिँदै बालबालिकाको सक्रिय सहभागिताबाट विद्यालय र समुदायमा सकारात्मक परिवर्तन ल्याउन सकिने धारणा व्यक्त गरिएको थियो।
