राजविराज । बालिकाको अपहरण गरी एक करोड नगद र पाँच किलो सुन फिरौति माग्ने व्यक्ति पुर्पक्षका लागि थुनामा गएका छन् ।
सप्तरीको खड्क नगरपालिका वडा नम्बर ८ बिसनपुर निवासी ७ वर्षीय नेहा खातुनको अपहरणमा संलग्न सोही नगरपालिका वडा नम्बर ९ लालपट्टी टोलका ३० बर्षिय ईम्तियाज अहमदलाई पुर्पक्षका लागि थुनामा पठाइएको हो ।
सप्तरी जिल्ला अदालतको मंगलबारको इजलासले उनलाई पुर्पक्षका लागि कारागार पठाउने आदेश दिएको सप्तरी प्रहरीका प्रमुख एसपी डम्बरबहादुर पुरीले जानकारी दिए ।
इम्तियाजले गत ५ फागुनमा इमरान खानकी छोरी नेहाको अपहरण गरेका थिए । बालिकाको अपहरण गरेका इम्तियाजले रु एक करोड नगद र पाँच तोला सुन फिरौति वापत मागेका थिए ।
सूचना पाउको प्रहरीले ७ फागुनको साँझ रुपनी गाउँपालिका १ स्थित खाँडो खोलाबाट ईम्तियाज अहमदलाई नियन्त्रणमा लिई नेहालाई सकुशल उद्धार गरेको थियो ।
पक्राउ परेका अहमदलाई प्रहरीले अपहरण, शरीर बन्धक तथा मानव ओसारपसार सम्बन्धी कसुरमा अनुसन्धान गरेको थियो ।
