राजविराज । तोकिएको शूल्कभन्दा पाँच गुणा बढी रकम तिर्न नसक्दा विद्यार्थीलाई परीक्षाबाट बंचित गराइएको छ ।
सप्तरीको छिन्नमस्ता गाउँपालिका वडा नम्बर ६ स्थित जनता मावि कुपहीमा डिप्लोमा सिभिल इन्जिनियरिंगमा अध्ययनरत विद्यार्थीलाई परीक्षाबाट बंचित गराइएको हो ।
तेस्रो सेमेष्टरमा अध्ययनरत विद्यार्थीलाई सिटिइभिटीले रु ५०० सय परीक्षा शुल्क तोकेको थियो । तर विद्यालयले रु दुई हजार ५०० लिएर मात्र प्रवेश पत्र उपलब्ध गराएको छ । यति रकम नदिनेलाई भने परीक्षाबाट बंचित गराइएको छ ।
आफूलाई विद्यालयको कोअर्डिनेटर भनिने दिनेश साहले विद्यार्थीसँग पाँच गुणा बढी रकम असुलेका छन् । साहले विद्यार्थीलाई आफ्नो व्यक्तिगत क्यूआर दिएर रकम मगाएको विद्यार्थीको भनाई छ ।
तोकिएको भन्दा बढी रकम नदिएपछि एक विद्यार्थीलाई परीक्षा दिनबाटै बंचित गरिएको छ । विद्यार्थी अंशु कुमार मण्डललाई परीक्षा दिनबाट बंचित गरिएको हो ।
पीडित विद्यार्थीहरुले राजविराजमा पत्रकारसँग कुरा गर्दै विद्यालयले आफूहरुसँग अन्याय गरेको बताए ।
बढी रकम मागेर प्रवेश पत्र नदिएको भन्दै विद्यार्थीहरुले एक साताअघि विद्यालयमा तालाबन्दी गरेका छन् । यसबारे गाउँपालिकामा ज्ञापन पत्र समेत बुझाएका छन् । तर, कुनै पनि सरोकारबालाले यसतर्फ चासो नदिएको विद्यार्थीको भनाई छ ।
विद्यार्थी अंशु कुमार मण्डलले आफूलाई परीक्षा दिनबाट बंचित गरिएको विषयमा निष्कर्ष ननिकालिए ताला नखोलिने बताएका छन् । अन्य विद्यार्थीले लिएको तोकिएको भन्दा बढी शूल्क फिर्ता गर्नुपर्ने माग राखेका छन् ।
विद्यालयका प्रधानाध्यापक लालकुमार मण्डलले विद्याथीको गुनासो आफू समक्ष पनि आएको बताए । ‘यस विषयमा कोअर्डिनेटर दिनेश साहसँग स्पष्टिकरण सोधिएको छ’ उनले भने, ‘थप प्रकृया पछि अगाडि बढाइनेछ ।’
बढी रकम असुली गर्ने दिनेश साह छिन्नमस्ता गाउँपालिका वडा नम्बर ६ का अध्यक्ष कपिलेश्वर साहका छोरा हुन् । प्रअ मण्डलका अनुसार वडा अध्यक्ष आफैंले छोरालाई विद्यालयमा राख्न लगाएका हुन् ।
