राजविराज । ठगीमा संलग्न रहेको आरोपमा सप्तरीका एक युवकसहित सात जना काठमाडौंबाट पक्राउ परेका छन् । सप्तरीका यी युवकले भारतीयहरुसँग मिलेर ठगी गरेको पाइएको प्रहरीले जनाएको छ ।
प्रहरीका अनुसार काठमाडौं महानगरपालिका वडा नम्बर १० थापागाउँ लाखेचौर मार्गस्थित सिर्तेल होलिडेज प्रा.लि नामको ट्राभल एजेन्सी यी व्यक्तिहरुले खोलेका थिए । यस एजेन्सीबाट सर्वसाधारण व्यक्तिलाई युरोप, एसिया, अफ्रिका लगायत १ सय ७५ देशहरूमा भ्रमणमा जानको लागि विभिन्न नम्बरबाट फोन गरी ट्राभल लोटरी परेको भन्दै झुक्याएर अत्यन्त सस्तो दरमा भ्रमण गराउने भनि विश्वास दिलाएका थिए । यो विश्वास दिलाएर पीडितहरूबाट रकम लिई भ्रमण नगराई रकम समेत फिर्ता नगरी ठगी गरेको भन्ने सूचनाको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले सातै जनालाई पक्राउ गरेको हो ।
पक्राउ पर्नेमा सप्तरीको कंचनरुप नगरपालिका वडा नम्बर १२ घर भई भक्तपुरको मध्यपुर थिमी नगरपालिका–२ गठ्ठाघर बस्ने २६ वर्षीय बिबेक रेग्मी, ललितपुर महालक्ष्मी नगरपालिका–२ बालकुमारी बस्ने भारत तेलंगाना हैदरावाद बोरण्डा थाना घर भएका ३९ वर्षीय हुसेन सैयद, ४४ वर्षीय साजिद ओमर सैयद, भारत तेलंगाना हैदरावाद चारमिनार थाना घर भएका ३४ वर्षीय महम्मद ईमरान, ३३ वर्षीय मिर खालिद हुसेन, ४० वर्षीय रजाक महम्मद र भारत तेलंगाना हैदरावाद कुकडपल्ली थाना घर भएका ४२ वर्षीय समादा गिरी रहेका छन् ।
प्रारम्भिक अनुसन्धानको क्रममा उनीहरूले हालसम्म ३२८ जना पीडितहरूबाट रु दुई करोड ७२ लाख ६५ हजार ५७४ ठगी गरेको खुल्न आएको प्रहरीले जानकारी दिएको छ ।
उनीहरूको साथबाट नेपाली नगद ७ लाख रूपैयाँ, कम्प्युटर १ थान, ल्यापटप १ थान, ट्याब १ थान, विभिन्न छाप ५ थान, रिसिप्ट प्याड ३ थान, विभिन्न व्यक्तिहरूको नाम, वतन, मोबाइल नम्बर समेतकोको विवरण उल्लेखित कुपनको अर्धकट्टी ५ हजार ७५ थान लगायतका सरसामान बरामद भएको प्रहरीको भनाई छ ।
उनीहरूलाई आवश्यक अनुसन्धान तथा कारवाहीको लागि जिल्ला प्रहरी परिसर काठमाडौं पठाइएको छ ।
