राजविराज । राजविराज बजार क्षेत्रभित्र लामखुट्टेविरुद्धको औषधि छर्किनका लागि पहल गरिदिन युवाहरुले प्रमुख जिल्ला अधिकारी (सीडीओ) लाई ज्ञापन पत्र बुझाएका छन् ।
किटनाशक औषधिसहितका उपकरण खरीद गरेपनि राजविराज नगरपालिकाले छर्किन नचाहेको भन्दै युवाहरुले यसका लागि पहल गरिदिन प्रमुख जिल्ला अधिकारी टुवराज पोखरेललाई ज्ञापन बुझाएका हुन् ।
‘कानुनले स्पष्ट रूपमा स्थानीय तहलाई जिम्मेवारी तोकेको अवस्थामा पनि लामखुट्टे नियन्त्रणका लागि औषधि छर्किने कार्य नगरेको, यो कार्यमा ढिलाइ हुनुका वास्तविक कारणहरू के हुन ? र वर्तमान गम्भीर अवस्थालाई ध्यानमा राख्दै तत्काल प्रभावकारी नियन्त्रणका लागि के कस्ता ठोस कदमहरू चालिनेछन् भन्ने विषयमा राजविराज नगरपालिकाबाट स्पष्ट, लिखित र तथ्यपरक स्पष्टीकरण उपलब्ध गराइदिनुहुन अनुरोध गर्दछौं’ बुझाइएको ज्ञापन पत्रमा भनिएको छ ।
सरसफाईलाई स्थानीय तहको एकल अधिकारभित्र स्पष्ट रूपमा समेटेको र स्थानीय सरकार सञ्चालन ऐन, २०७४ को दफा ११ उपदफा ४(ख) १२ अनुसार “जुनेटिक र कीटजन्य रोगको नियन्त्रण तया व्यवस्थापन सम्बन्धी कार्य स्थानीय तहको प्रत्यक्ष जिम्मेवारी भएको ज्ञापनमा उल्लेख गरिएको छ । ‘यस्ता स्पष्ट संवैधानिक तथा कानुनी प्रावधान रहेको हुँदा पनि राजविराज नगरपालिका क्षेत्रभित्र लामखुट्टे नियन्त्रणका लागि औषधि छर्किने कार्य हालसम्म प्रभावकारी रूपमा सञ्चालन नगरिएकोले सर्वसाधारण नागरिकहरू डेंगु, मलेरिया लगायतका गम्भीर रोगको जोखिममा परिरहेका छन्’ ज्ञापनमा भनिएको छ ।
