राजविराज । सप्तरीको सुरुङा नगरपालिकाबाट वेपत्ता पारिएकी बालिका भेटिएकी छन् । बालिकालाई सकुशल फेला पारिएको सप्तरी प्रहरीले जानकारी दिएको छ ।
सुरुङा नगरपालिका वडा नम्बर ३ बस्ने १४ बर्षीया बालिकालाई चैत ३ गतेबाट वेपत्ता पारिएको थियो । स्थानीय महेश्वर यादवको घरमा बालश्रमिकको रुपमा काम गर्दै आएकी बालिकालाई शुक्रबार फेला पारिएको सप्तरी प्रहरीका प्रवक्ता एवं डीएसपी डम्बरबहादुर पुरीले जानकारी दिए ।
‘बालिकालाई फेला पारी सेफ हाउसमा सुरक्षित राखिएको छ’ उनले भने, ‘पीडित पक्षबाट जाहेरी लिने काम समेत भएको छ ।’
बालिकालाई गर्भवती बनाएर गर्भपतन गराएको भन्दै ४ चैतमा इलाका प्रहरी कार्यालय कडरबोनामा उजुरी परेको थियो । यसपछि अनुसन्धान शुरु गरेको प्रहरीले बालिकासहित घरधनी महेश्वर समेत वेपत्ता भएको पाएका थिए ।
प्रहरीको अनुसन्धानका क्रममा महेश्वरको घरबाट बालिकालाई उनको दिदी पर्नेले लिएर गएका थिए । तर ती दिदी पनि वेपत्ता थिइन् ।
प्रहरीले व्याप्क खोजतलाश गरेपछि बालिकालाई फेला पारिएको बताएको छ । बालिकालाई गर्भवती बनाएर गर्भपतन गराएको भन्ने विषयमा भने अनुसन्धान भइरहेको डीएसपी पुरीले बताए । ‘बालिकाको मेडिकल जाँचसहितका अन्य अनुसन्धान गरिरहेका छौं’ उनले भने ।
