राजविराज । हालै सम्पन्न भएको प्रतिनिधी सभा सदस्य पदमा निर्वाचित सप्तरीका तीन सांसदले मैथिली भाषामा शपथ ग्रहण गर्ने भएका छन् । एक जनाले थारु भाषामा शपथ लिनेछन् ।
दुई जना निर्वाचित र एक समानुपातिक सांसदले आफ्नो मातृभाषा मैथिलीमा शपथ लिने भएका हुन् । एक जना निर्वाचितले थारु भाषामा शपथ लिने तयारी गरेका छन् ।
क्षेत्र नम्बर २ बाट निर्वाचित रामजी यादव, क्षेत्र नम्बर ४ बाट निर्वाचित सिताराम साह र समानुपातिक सांसद डा. अंकिता ठाकुरले मैथिली भाषामा शपथ लिने भएका हुन् ।
जिल्लाको क्षेत्र नम्बर ३ बाट निर्वाचित अमरकान्त चौधरीले थारु भाषामा शपथ लिने तयारी गरेका छन् ।
जिल्लाबाट चार जना प्रत्यक्ष निर्वाचित हुँदा दुई जना समानुपातिक मार्फत छनौट भएका छन् । दुई जनाले नेपाली भाषामा शपथ लिने बताइएको छ ।
क्षेत्र नम्बर १ बाट पुष्पा चौधरी, २ बाट रामजी यादव, ३ बाट अमरकान्त चौधरी र ४ बाट सिताराम साह निर्वाचित भएका छन् भने समानुपातिक मार्फत् खगेन्द्र कर्ण र डा. अंकिता चौधरी सांसद बनेका छन् ।
सांसदहरुको शपथ ग्रहण कार्यक्रम चैत १२ गते भोली हुँदैछ ।
