राजविराज । करिब आठ वर्षदेखि अरूको घरमा घरेलु काम गर्दै आएकी एक १४ वर्षीया बालिकालाई गर्भवती बनाएर गर्भपतन गराएको भन्दै प्रहरीमा निवेदन परेको छ ।
सप्तरीको सुरुङ्गा नगरपालिका वडा नम्बर ३ लक्ष्मीपुरकी ती बालिका गाउँकै महेश्वर यादवको घरमा बालश्रमिकको रुपमा काम गर्दै आएकी थिइन् । बालिकालाई लुकाइछिपाइ गर्भपतन गराइएको आशंका गर्दै इलाका प्रहरी कार्यालय कडरबोनामा निवेदन परेको छ ।
बालिकाकी भाउजु पर्नेले दिएको निवेदनमा केही दिनअघि मात्र बालिका गर्भवती भएको जानकारी प्राप्त भएको र यसबारे सम्बन्धित व्यक्तिसँग बुझ्न खोज्दा घरधनीले आफूलाई कुनै जानकारी नभएको भन्दै पन्छिन खोजेको उल्लेख गरिएको छ । निवेदनमा भनिएको छ, ‘तर स्थानीय स्रोत र छिमेकीहरूसँग बुझ्दा आरोपित पिडकहरुले बालिकालाई अन्यत्र लगेर गोप्य रूपमा गर्भपतन गराइएको हुन सक्छ ।’
घटनामा घरधनी महेश्वर यादवसहित उनका परिवारका सदस्य तथा अन्य व्यक्तिहरूको समेत संलग्नता हुन सक्ने भन्दै उनीहरूलाई प्रहरीमा झिकाई सत्यतथ्य अनुसन्धान गर्न माग गरिएको छ ।
निवेदन परेपछि अनुसन्धानमा जुटेको प्रहरीले बालिकासहित उनीसँग जोडिएका कसैलाई पनि फेला पार्न सकेको छैन् ।
निवेदन परेपछि बालिका खोज्न महेश्वरको घरमा पु्गेको प्रहरीले बालिकासँगै महेश्वरलाई पनि फेला पार्न सकेको छैन् ।
ती बालिकाको दिदी नाता पर्ने सुरुङा ४ निवासी आशियादेवीले महेश्वरको घरबाट लिएर गएको जानकारी पनि आएको र आशियादेवी पनि फेला पर्न नसकेको सप्तरी प्रहरीका प्रवक्ता एवं डीएसपी डम्बरबहादुर पुरीले जानकारी दिए ।
बालिका फेला पारेर हामी स्वास्थ्य परीक्षण गराउने र त्यसपछि आउने रिपोर्ट अनुसार अनुसन्धान प्रकृया अगाडि बढाउने डीएसपी पुरीले बताए ।
