राजविराज । सप्तरी क्षेत्र नम्बर ३ बाट एकै परिवारका काका–भतिजा प्रतिनिधी सभा सदस्य पदका लागि निर्वाचन लडेका थिए । भतिजाले जीत निकाल्दा काका पराजित भएका छन् ।
यो क्षेत्रमा ताराकान्त चौधरी नेकपा एमालेबाट र अमरकान्त चौधरी राष्ट्रिय स्वतन्त्र पार्टी (रास्वपा) बाट निर्वाचन लडेका थिए । ताराकान्त काका हुन् भने अमरकान्त भतिजा ।
उनी काकासँगै जनता समाजवादी पार्टी (जसपा) नेपालका अध्यक्ष उपेन्द्र यादव समेतलाई हराएका छन् । अमरकान्त ३२ हजार ८७५ मत ल्याएर निर्वाचित भएका छन् ।
जसपा नेपालका अध्यक्ष यादव १५ हजार २३९ मत ल्याएर दोस्रो हुँदा नेपाली कांग्रेसका दिनेश कुमार यादवले आठ हजार ४२८ मत ल्याएर तेस्रो भएका छन् ।
निर्वाचन जितेका अमरकान्तका काका ताराकान्त ६ हजार ७१५ मत ल्याएर चौथो स्थानमा छन् । जनमत पार्टीका सुरेन्द्र प्रसाद शर्मा दुई हजार ८६९ सहित पाँचौ, नेपाली कम्युनिष्ट पार्टी (नेकपा) का उम्मेदवार एक हजार ६३५ मतसहित छैठौं, राष्ट्रिय प्रजातन्त्र पार्टी (राप्रपा) का उम्मेदवार उम्देश्वर प्रसाद साह ५५६ सहित सातौं, उज्यालो नेपाल पार्टीका परमेश्वर लाल साह २१२ मतसहित आठौं, आम जनता पार्टीका धनिकलाल चौधरी १८८ मतसहित नबौं र नेपाल जनता पार्टीका सन्तोष कुमार चमन १६८ मतसहित दशौं स्थानमा रहे ।
निर्वाचित भएका चौधरी २०७९ को स्थानीय तहको निर्वाचनमा आफ्नो गृह नगर डाक्नेश्वरी नगरपालिकाको मेयरमा उम्मेदवारी दिएका थिए । तर, जित्न सकेनन् ।
अमरकान्तका पिता चन्द्रकान्त पनि राजनीतिज्ञ थिए । उनको गत पुसको अन्तिम साता निधन भइसकेको छ । स्व. चन्द्रकान्त २०७४ को निर्वाचनमा सप्तरी ३ मा तत्कालीन राष्ट्रिय जनता पार्टी (राजपा) बाट निर्वाचित भएका थिए ।
आफ्ना भतिजासँँग यस पटक हार व्यहोरेका ताराकान्त २०७० सालको दोस्रो संविधान सभा निर्वाचनमा एमालेबाटै सप्तरी ३ मा निर्वाचित भएका थिए । २०७४ मा भने आफ्नै दाजु चन्द्रकान्तसँग ताराकान्त पराजित भएका थिए ।
