राजविराज । नेपाली कांग्रेस, सप्तरीका सभापति हुन् रामदेव साह । १४औं महाधिवेसनबाट पार्टीको जिल्ला सभापतिमा निर्वाचित भएका हुन् उनी । पार्टीमा निर्वाचित भएपनि जन अनुमोदित हुन सकेनन् । एक पटक मात्र होइन, तीन पटक चुनाव लड्दा पनि उनी जित्न सकेनन् ।
साह २०७४ सालदेखि कांग्रेसबाटै निर्वाचन लड्दै आएका छन् । २०७९ र २०८२ मा पनि उनले प्रतिनिधी सभा सदस्य पदमा सप्तरी क्षेत्र नम्बर १ बाटै उम्मेदवारी दिए । तर, जित्न सकेनन् ।
२१ फागुनमा भएको प्रतिनिधी सभा सदस्य पदको निर्वाचनमा उनी चौथो स्थानमा आए । यो क्षेत्रबाट रास्वपाकी पुष्पा चौधरी २८ हजार १९५ मत ल्याई निर्वाचित हुँदा स्वाभिमान पार्टीका सुमित कुमार सात हजार ८४७ मत ल्याएर दोस्रो बनेका छन् । नेकपा एमालेका सुमनराज प्याकुरेलले सात हजार ६५२ मत ल्याएर तेस्रो बन्दा कांग्रेसका साहले ६ हजार ९९४ मत प्राप्त गरेका छन् ।
यसअघि भएका निर्वाचनमा त साह तेस्रो हुँदै आएका थिए । २०७४ को प्रतिनिधी सभा सदस्य निर्वाचनमा क्षेत्र नम्बर १ बाट संघीय समाजवादी फोरमका उम्मेदवार डा. सूर्यनारायण यादव निर्वाचित भएका थिए ।
यादवले २१ हजार ७१२ मत प्राप्त गरी निर्वाचित हुँदा नेकपा माओवादीका अशोक मण्डल १८ हजार २२५ मत ल्याएर दोस्रो भएका थिए । कांग्रेसका साह नौ हजार ५०६ मत ल्याएर तेस्रो स्थान बनाएका थिए ।
२०७९ मा भएको निर्वाचनमा साहले मत संख्या त बढाए तर, जित्न सकेनन् । यो निर्वाचनमा जनता समाजवादी पार्टीका नवलकिशोर साह २३ हजार ६०४ मत ल्याएर निर्वाचित भएका थिए । जनमत पार्टीका जयकान्त राउत १९ हजार ९९६ मत प्राप्त गरी दोस्रो हुँदा साह १४ हजार ३१२ मत ल्याएर तेस्रो बनेका थिए ।
