राजविराज । सप्तरीको शम्भुनाथ नगरपालिकाका मेयर जितेन्द्र प्रसाद गुप्ता निलम्बित भएका छन् । जिल्लामा निलम्बनमा पर्नेमा गुप्ता दोस्रो मेयर हुन् । यसअघि राजविराजका मेयर भीमराज यादव पनि निलम्बनमा परिसकेका छन् ।
अख्तियार दुरुपयोग अनुसन्धान आयोगले मेयर गुप्ताबिरुद्ध विशेष अदालतमा घूस लिएको आरोपमा आरोप पत्र दायर भएसँगै उनी निलम्बित भएका छन् ।
मेयर गुप्तासँगै नगरपालिकाका इन्जिनियर रामचन्द्र साहबिरुद्ध समेत विशेष अदालतमा आरोप पत्र दायर भएको छ । गुप्ता र साहको आपसी मिलोमितोमा विद्यालयको सभाहल निर्माणको अन्तिम बिल भुक्तानी प्रयोजनका लागि सेवाग्राहीसँग रु १ लाख ४० हजार घूस लिएको पुष्टि भएपछि दुबैबिरुद्ध भ्रष्टाचार निवारण ऐन, २०५९ को दफा ३ को उप दफा (१) बमोजिमको कसुरमा आरोप पत्र दायर गरिएको अख्तियारले जनाएको छ ।
इन्जिनियर साहलाई अख्तियारको इटहरीस्थित कार्यालयबाट खटिएको टोलीले गत ३ माघमा रु १ लाख ४० हजार घूस लिदैं गर्दा पक्राउ गरेको थियो । साहलाई नियन्त्रणमा लिएर अख्तियारले अनुसन्धान शुरु गरेपछि मेयर गुप्ताको पनि संलग्नता देखिएपछि दुबैबिरुद्ध आरोप पत्र दायर गरिएको छ ।
गुप्ता र साह दुबैलाई भ्रष्टाचार निवारण ऐन, २०५९ को दफा ३ को उपदफा (१) को कसुरमा बिगो एक लाख ४० हजार कायम गरी कैद र बिगोबमोजिम जरिवानाको माग दावीसहित आरोप पत्र दायर गरिएको अख्तियारले जनाएको छ ।
आरोप पत्र दायर भएसँगै मेयर गुप्ता निलम्बनमा परेका छन् । उनी ३० बैशाखमा भएको स्थानीय तहको निर्वाचनमा नेकपा एकीकृत समाजवादी पार्टीबाट मेयरमा निर्वाचित भएका थिए ।
यसअघि राजविराज नगरपालिकाका मेयर भीमराज यादव पनि निलम्बनमा परिसकेका छन् ।
राजविराजस्थित राजरंगशालाको निर्माणका क्रममा भ्रष्टाचार गरेको भन्दै अख्तियारले उनीसहित सातजनाविरुद्ध विशेष अदालतमा गत असारमा आरोपपत्र दायर गरेको थियो ।
रंगशालाको निर्माण कार्यमा न्यू गहिल कन्ट्रक्सनका तत्कालिन सञ्चालक भीमराज यादवसहित उदय निर्माण सेवाका सञ्चालक उदय श्रेष्ठ, जिल्ला विकास समिति सप्तरीका तात्कालीन इन्जिनयर विकास श्रेष्ठ, जिल्ला खेलकुद विकास समितिका तात्कालीन प्रमुखद्वय लक्ष्मण मण्डल, महेन्द्रप्रसाद यादव, समितिका अध्यक्ष एजेट न्यासुर र उपाध्यक्ष धिरेन्द्र बर्माले अनियमितता गरेको भन्दै अख्तियारले यी सबैविरुद्ध आरोपपत्र दायर गरेको छ ।
यादव जनता समाजवादी पार्टी (जसपा) बाट नगर प्रमुख पदमा निर्वाचित भएका थिए ।
