राजविराज । सप्तरीका राजनीतिक दलका नेताहरुले जग्गाको कित्ताकाट बन्द हुँदा सर्वसाधारणलाई अत्यधिक समस्या खेप्नुपरिरहेको प्रमुख जिल्ला अधिकारी समक्ष गुनासो गरेका छन् ।
जिल्लाको शान्ति सुरक्षा लगायतका बिषयमा प्रमुख जिल्ला अधिकारी भूपेन्द्र थापाले राजनीतिक दलका नेताहरुसँग आयोजना गरेको अन्तरकृया कार्यक्रममा बोल्दै नेताहरुले यस्तो गुनासो गरेका हुन् । उनीहरुले जग्गा भएपनि कित्ताकाट नहुँदा अध्ययन, विवाह, उपचारसहितका काम प्रभावित भइरहेको बताए ।
अन्तरकृया कार्यक्रममा बोल्दै लोकतान्त्रिक समाजवादी पार्टी (लोसपा) का नेता जयनारायण यादवले कित्ताकाट नहुँदा बालबालिकाको पढाई, विवाह र उपचार सबै रोकिएको बताए ।
नेपाल मजदूर किसान पार्टीका अध्यक्ष दिगम्बर यादवले कित्ताकाट रोकिएपछि जनताको आधारूत समस्याहरु समाधान हुन नसकिरहेको बताए ।
कित्ताकाट अबिलम्ब फुकुवा नभए धेरै समस्या आउन सक्ने बताउँदै उनीहरुले यसतर्फ अबिलम्ब पाइला चाल्न प्रमुख जिल्ला अधिकारीसँग आग्रह गरे ।
कार्यक्रममा प्रमुख जिल्ला अधिकारी थापाले पालिकाका जनप्रतिनिधीकै कारण कित्ताकाट सुचारु हुन नसकेको बताए । उनले पालिकाहरुले जग्गाको वर्गीकरण गर्ने कार्य नटुँग्याउँदा कित्ताकाट सुचारुमा बिलम्ब भइरहेको बताए ।
‘जग्गाहरुको वर्गीकरण सकाउनु जरुरी छ’ उनले भने, ‘यो काम सकिएलगत्तै कित्ताकाट सुचारु हुन्छ ।’
