राजबिराज । सप्तरीका राजनीतिक दलका नेताहरुले उत्सवहरुमा प्रयोग गरिने डिजे अबिलम्ब बन्द गराउन प्रशासनसँग माग गरेका छन् ।
प्रमुख जिल्ला अधिकारी भूपेन्द्र थापाले जिल्लाको शान्तिसुरक्षा, सेवा प्रवाह लगायतका बिषयमा आयोजना गरेको अन्तरकृया कार्यक्रममा बोल्दै राजनीतिक दलका नेताहरुले डिजे एक किसिमको आतंक नै रहेको भन्दै बन्द गराउन माग गरे ।
पूर्व मन्त्री एवं नेकपा माओवादी केन्द्रका जिल्ला अध्यक्ष उमेश कुमार यादवले डिजेका कारण स्वस्थ्य व्यक्ति पनि अस्वस्थ्य बन्न लागेको बताए । ‘यसले मुटुको धड्कन बढाउँदै व्यक्तिलाई त्रसित बनाउने काम पनि गरिरहेको छ’ उनले भने, ‘यो अबिलम्ब बन्द हुनु जरुरी छ ।’
अध्यक्ष यादवले सुशासन र सेवा प्रवाहमा प्रशासनलाई गम्भीर बन्न सुझाव समेत दिए ।
नेपाली कांग्रेसका जिल्ला सचिव सनत कुमार मण्डलले केहि दिन अगाडि मात्रै डिजे बजाउँदा महादेवा गाउँपालिकामा एक व्यक्तिको ज्यानै गएको जानकारी गराउँदै बन्द गराउन माग गरे । उनले यो बन्द नभए धेरै व्यक्ति मुटुको रोगी हुन सक्ने भन्दै अबिलम्ब बन्द गराउन प्रमुख जिल्ला अधिकारीसँग आग्रह गरे ।
उनले पालिका तथा सरकारी कार्यालयमा कर्मचारी नियमित नबस्दा सेवाग्राहीलाई समस्या भइरहेकोतर्फ ध्यानाकर्षण गराए ।
प्रमुख जिल्ला अधिकारी थापाले डिजे बन्द गराउन प्रशासन तयार रहेको बताए । ‘यसबारेमा छिट्टै निर्णय गरेर अघि बढ्छौं’ उनले भने ।,
