राजबिराज । मधेश प्रदेशका मुख्यमन्त्री सरोज कुमार यादवले मनोमानी गर्न थालेको भन्दै सत्ता गठबन्धनमा विवाद देखापरेको छ । मुख्यमन्त्री यादवले एकल निर्णयमा मन्त्रालय फुटाएको भन्दै गठबन्धनमा आबद्ध पार्टीका नेताहरु आक्रोशित बनेका छन् ।
मुख्यमन्त्री यादवले हालै शिक्षा तथा समाज कल्याण मन्त्रालय फुटाएका छन् । एकलौटी निर्णय गरी मन्त्रालय फोडेर आफ्ना पार्टीका सांसद सुरिता साहलाई व्यवस्थापन गरी मुख्यमन्त्री भारत गएका छन् । उनी भारत पुगिसकेपछि मात्रै मन्त्रीपरिषद् पुनर्गठन गरेको विज्ञप्ति प्रदेश प्रमुखको कार्यालयले जारी ग¥यो ।
जनमत पार्टीका संसदीय दलका नेता महेश प्रसाद यादवले सम्हालेको शिक्षा तथा समाज कल्याण मन्त्रालय फोडेर मुख्यमन्त्री यादवले खेलकुद तथा समाज कल्याण मन्त्रालय र शिक्षा तथा संस्कृति मन्त्रालय बनाएका छन् ।
चार महिनादेखि बिना विभागीय मन्त्री रहेकी साहलाई खेलकुद तथा समाज कल्याण र मन्त्री यादवलाई शिक्षा तथा संस्कृति मन्त्रालयको जिम्मेवारी तोकिएको छ । मन्त्री यादव भने नयाँ मन्त्रालय सम्हाल्ने पक्षमा छैनन् ।
यो प्रदेशमा छ दलीय गठबन्धनको सरकार छ । जसको नेतृत्व जसपाले लिएको छ । मुख्यमन्त्री जसपाको रहेकाले सांसद साहलाई पार्टीमा टिकाउनकै लागि मन्त्रालय फोडेको उनीमाथि आरोप छ ।
पार्टीमा सांसदलाई टिकाउन मुख्यमन्त्रीले मन्त्रालय फोडेकोमा गठबन्धनमा रहेका ५ दल अब के गर्ने विषयमा छलफल शुरु गरेका छन् । सोमवार जसपा बाहेक ५ दलका संसदीय दलका नेता मधेश भवनमा यसबारे छलफल गरेको श्रोतले जनाएको छ ।
बैठकमा नेपाली कांग्रेस मधेश प्रदेश संसदीय दलका नेता कृष्णा यादव, नेकपा माओवादी केन्द्रका प्रदेश संसदीय दलका उपनेता युवराज भट्टराई, नेकपा एस प्रदेश संसदीय दलका प्रमुख सचेतक कनिस पटेल, लोसपा प्रदेश संसदीय दलका नेता अभिराम शर्मा र जनमत पार्टी प्रदेशका संसदीय दलका नेता महेश प्रसाद यादव सहभागी थिए ।
मुख्यमन्त्री यादवले मन्त्रालय फोडेपछि प्रदेशमा जसपा एक्लिएको छ । ५ दलको बैठकले मुख्यमन्त्री यादव चोर बाटोबाट मन्त्रालय टुक्रयाएको ठहर गरेको छ । बैठकमा सहभागी नेताहरूले मुख्यमन्त्रीले गरेको मनपरीबारे केन्द्रीय नेतृत्वलाई ध्यानाकर्षण गराउने निर्णय गरेको एक नेताले जानकारी दिए ।
बैठकमा सहभागी एक नेताले भने, ‘प्रदेशमा काम शून्य छ । जनता प्रदेश सरकारको अनुभूति गर्न पाएका छैनन् । तर मुख्यमन्त्री यादव गैरजिम्मेवार काम गरिरहेका छन् । यसमा हाम्रो आपत्ति छ । यो विषयमा छलफलकै लागि बैठक बसेका थियौं ।’
‘मन्त्रालय नै फुटाउनुपर्ने आवश्यक्ता थियो भने कम्तीमा गठबन्धन वा मन्त्रीपरिषद्को बैठकमा प्रस्ताव ल्याउनुप¥थ्यो’, उनले भने, ‘तर कसैलाई जानकारी छैन ।’
