राजविराज । हमासको आक्रमणमा परी इजरायलमा ज्यान गुमाउने नेपालीको सम्झनामा सप्तरीको बिभिन्न ठाउँमा दीप प्रज्जवलन र श्रद्धाञ्जलीसभाको आयोजना गरिएको छ ।
सदरमुकाम राजविराजस्थित गजेन्द्र चोकमा सप्तरी युथ नेपालद्धारा मैनबत्ति प्रज्जलन गर्दै एक मिनेट मौन धारण गरिएको छ । मृतकको आत्माको चिरशान्तिको कामना गर्दै मैनबत्ति प्रज्जलन गरिएको सप्तरी युथ नेपालका बिष्णु यादवले जानकारी दिए ।
राजविराजमै जनता समाजवादी पार्टी (जसपा) निकट महिला संघद्वारा पनि इजरायलमा हमासको आक्रमणमा मारिएकाको सम्झनामा मैनबत्ति प्रज्जवलन गरिएको छ ।
यस्तै, कंचनरुप नगरपालिकाको रुपनगर चोकमा पनि मारिएका नेपालीको सम्झनामा मैनबत्ति बालिएको छ ।
त्यस्तै, रुपनी गाउँपालिकाको रुपनी बजारमा पनि मैनबत्ति बालिएको स्थानीय युवा सन्तोष यादवले जानकारी दिए । उनका अनुसार एक मिनेट मौनधारण समेत गरिएको थियो ।
केहि दिनअघि इजरायलमा हमासले गरेको आक्रमणमा परी १० जना नेपालीको ज्यान गएको थियो ।
