राजबिराज । नेपाली कांग्रेसका सह महामन्त्री महालक्ष्मी उपाध्याय ‘डिना’ ले पछिल्लो समयमा राजनीतिमा विकृति र बिचलन बढेको बताएकी छन् ।
शनिबार नेपाल प्रेस युनियन, सप्तरीका पदाधिकारीसँग कुरा गर्दै उपाध्यायले यस्तो कुरा बताएकी हुन् । ‘राजनीतिमा विकृति र बिचलन बढेको छ’ उनले भनिन्, ‘राजनीतिलाई सफा र स्वच्छ बनाउनु जरुरी छ । यसका निम्ति सबै राजनीतिज्ञलाई ध्यान दिनु जरुरी छ ।’
उनले राजनीतिमा पैसा हावी हुन थालेको भन्दै यसको न्यूनिकरण गर्नुपर्नेमा जोड् दिइन् ।
प्रतिनिधी सभा सदस्य समेत रहेकी उनले महिला प्रत्यक्ष चुनाव जित्न सक्षम रहेपनि राजनीतिक दलका नेतृत्वले महिलालाई अवसर दिने नगरेको गुनासो गरिन् । संविधानले महिलालाई एक तिहाई अधिकार दिएपनि कार्यान्वयनमा नआएको बताइन् ।
‘संविधान अनुसार सबै निर्वाचनमा एक तिहाई महिला उम्मेदबार बनाउनुपर्नेमा दलका नेतृत्वहरुले बेइमानी गरिरहेका छन्’ उनले भनिन्, ‘महिलालाई अवसर दिए प्रत्यक्ष चुनाव जित्न सक्छन् ।’
संविधान महिलामैत्री भएपनि उल्लेख गरिएका बुँदा कार्यान्वयन नभइरहेको बताउँदै उनले राजनीतिक दलका नेतृत्वमा संविधानले दिएको अधिकार कटौति गर्ने मानसिकता रहेको बताइन् ।
एक अर्काे प्रसंगमा उनले बर्तमान गठबन्धनमा कुनै समस्या नरहेको बताइन् । अहिलेसम्म गठबन्धनको सरकार सहमतिमै चलिरहेको उनले बतइन् । यद्यपी सरकारको नियमित काम सन्तोषजनक नभएको भन्दै उनले यसप्रति पार्टीमा असन्तुष्टि बढेको उल्लेख गरिन् ।
