राजविराज । ‘सडकमा तपाईंको सुरक्षार्थ ट्राफिक प्रहरीको प्रयास’ र ‘स्थानीय तहमा अपराध न्यूनिकरण’ कार्यक्रम सप्तरीमा एकैसाथ सम्पन्न भएको छ ।
जिल्लाको शम्भुनाथ नगरपालिकामा आईतबार जिल्ला प्रशासन कार्यालय र जिल्ला ट्राफिक प्रहरी कार्यालयको संयुक्त आयोजनामा यो कार्यक्रमको आयोजना गरिएको हो ।
कार्यक्रमका बक्ताहरुले ट्राफिक प्रहरीले सडकमा ट्राफिक प्रहरीले सर्वसाधारणको सुरक्षाका लागि गरिरहेको कामको प्रशंसा गरे । ट्राफिक प्रहरीले काम गरिरहेपनि सबारी चलाउनेहरु ट्राफिक नियमको वेवास्ता गर्दा दुर्घटना हुने गरेको उनीहरुले बताए ।
यस्तै, समाजमा हुने अपराधलाई न्यूनिकरण गर्न समाजकै मानिसहरुले ध्यान दिनुपर्ने कार्यक्रमका बक्ताले जोड् दिए । कुनै पनि समाजमा हुने अपराध बाहिरका व्यक्तिले आएर नगर्ने गरेको र समाजकै व्यक्तिले गर्ने भएकाले यसतर्फ समाजका अगुवाहरुले ध्यान दिनुपर्ने बताए ।
कार्यक्रममा प्रमुख जिल्ला अधिकारी किरण थापाले दुर्घटना र सामाजिक अपराध दुबैलाई न्यूनिकरण गर्नुपर्नेमा जोड् दिए । ‘यो दुबैले व्यक्ति घाइते हुनेदेखि ज्यान नै गुमाइरहेका छन्’ उनले भने, ‘यसतर्फ सबैको ध्यान जानु जरुरी छ ।
कार्यक्रममा शम्भुनाथ नगरपालिकाका कार्यबाहक मेयर अनिता कुमारी चौधरीले अकालमा कसैको ज्यान जान नदिन सामाजिक अपराध र दुर्घटना न्यूनिकरण हुनुपर्ने बताइन् ।
कार्यक्रममा जिल्ला प्रहरी प्रमुख एसपी गजुसिद्दि बज्राचार्य, वडा अध्यक्षहरु, समाजसेवीसहितकाले मन्तव्य व्यक्त गरेका थिए ।
कार्यक्रमपछि ट्राफिक नियम उल्लेख गरिएको ५ सयभन्दा बढी पर्चा बितरण गरिएको जिल्ला ट्राफिक प्रहरी कार्यालयका प्रमुख प्रहरी निरीक्षक मेदनी प्रसाद साहले जानकारी दिए ।
उनका अनुसार सार्वजनिक यातायातमा ट्राफिक जनचेतना सम्बन्धी स्टिकर पनि टाँसिएको र यसलाई निरन्तरता दिइनेछ ।
