राजविराज । सप्तरीको छिन्नमस्ता गाउँपालिकामा दोस्रो राष्ट्रिय खुल्ला अध्यक्ष कप भलिवल प्रतियोगिता शुरु भएको छ ।
प्रतियोगिताको उद्घाटन खेलमा छिन्नमस्ता युवा क्लव सखडा विजयी भएको छ । सखडाले न्यू श्री रामजानकी युवा क्लव खुरहुरियालाई पराजित गर्दै विजयी यात्रा शुरु गरेको हो ।
छिन्नमस्ता गाउँपालिकाले आयोजना गरेको प्रतियोगिताको पहिलो खेलमा ५ सेटको खेल हुँदा खुरहुरिया ४ पटक र सखडा ५ पटक विजयी हुँदै जीतको यात्रा शुरु गरेको हो ।
गाउँपालिकाकी उपाध्यक्ष राजुदेवी यादवको अध्यक्षता र अध्यक्ष विद्यानन्द चौधरीको प्रमुख आतिथ्यमा आयोजित एक कार्यक्रमकाबीच प्रतियोगिताको उद्घाटन कार्यक्रम भएको छ ।
प्रतियोगिताको उद्घाटन गर्दै गाउँपालिका अध्यक्ष विद्यानन्द चौधरीले खेलकुद पनि एक किसिमको विकास भएकाले यसतर्फ पनि पालिकाले गम्भीर ध्यान दिएको बताए । उनले भलिवल छिन्नमस्ताको धेरै पुरानो खेल भएको र यसअघि बन्द रहेकोमा गत बर्षदेखि प्रारम्भ गरिएको बताए ।
अध्यक्ष चौधरीले भलिवलसहित क्रिकेट र फुटबल खेलको विकासका लागि पनि पालिकाले ध्यान दिने बताए ।
