राजविराज । रामराजा स्वास्थ्य विज्ञान प्रतिष्ठानको निर्माण अबिलम्ब सुचारु गर्नुपर्ने माग गर्दै सप्तरी युथ नेपालद्धारा बुधबार राजविराजमा प्रदर्शन गरिएको छ ।
तत्कालिन प्रधानमन्त्री केपी शर्मा ओलीले राजविराज नगरपालिका वडा नम्बर १० बिरौलस्थित स्वास्थ्य विज्ञान प्रतिष्ठान शिलान्यास गरिएको थियो । २२ असार २०७८ मै ओलीले भर्चुअल माध्यमबाट शिलान्यास गरेपनि काम अझै अघि बढ्न सकेको छैन् ।
प्रतिष्ठान निर्माणस्थलमा बोर्ड राख्ने, जग्गा तारजालीले घेरबार गर्ने र डिपिआर बनाउनेबाहेक अन्य काम अघि बढ्न सकेको छैन् ।
काम अघि बढ्न नसक्दा सप्तरी युथ नेपालको अगुवाईमा बुधबार बिहान राजविराजमा प्रदर्शन गरिएको छ । युवाले सप्तरीको विकासमा जिल्लाबासी एकजुट हौं, विज्ञान प्रतिष्ठानको निर्माण अबिलम्ब सुचारु गर, राजनीतिकभन्दा एक कदम माथि उठ’ जस्ता नारा लगाएका छन् ।
उता काम अघि बढ्न नसकेपछि स्थानीयले एकसातादेखि अनिश्चितकालिन रिले अनशन शुरु गरेका छन् । स्थानीयले रामकुमार दासको नेतृत्वमा संर्घष समिति बनाएर २४ घण्टे रिले अनशन शुरु गरेका हुन् ।
