राजविराज । डा. सिके राउत नेतृत्वको जनमत पार्टीका कार्यकर्ताद्धारा सप्तरीमा एक जना पत्रकार उपर आक्रमण गरिएको छ ।
डाक्नेश्वरी नगरपालिकामा पोखरी ठेक्का सम्बन्धमा स्थानीयले गरिरहेको प्रदर्शनको रिपोर्टिङ गर्न गएका पत्रकार साहलाई जनमत पार्टीका स्थानीय कार्यकर्ताहरु अमरेन्द्र यादव र अनिल यादवले हातपात गरेका हुन् । यी दुबैले एक्कासी आफूलाई ताकेरै हातपात गरेको पत्रकार साहले बताएका छन् ।
नेपाल पत्रकार महासंघ, सप्तरीले प्रेस स्वतन्त्रताप्रति प्रतिबद्ध रहेको बताउने राजनीतिक दलकै कार्यकर्ताबाट पत्रकार असुरक्षित हुनु दुःखद भएको बताएको छ । ‘रिपोर्टिङ गर्न गएका पत्रकारमाथि हातपात गरिएको घट्नाको हामी घोर भत्र्सना गर्दछौं । यो घट्नाले प्रेस स्वतन्त्रताको खिल्ली उडाएको हाम्रो ठहर छ’ महासंघले जारी गरेको बिज्ञप्तीमा उल्लेख छ ।
पत्रकार साहमाथि हातपात गर्ने दुबैलाई कानुन बमोजिम कार्वाही गर्न सम्बन्धित निकायसँग माग गर्दै विज्ञप्तीमा भनिएको छ, ‘कार्वाही नगरिए हामी आन्दोलनमा उत्रने जानकारी गराउँदछौं ।’
