राजविराज । यसअघि सप्तरीका जनतालाई सडक र अन्य भौतिक कामका लागि सिरहा जानुनपर्ने भएको छ ।
मधेश प्रदेश सरकारबाट प्राप्त योजना कार्यान्वयनका लागि सप्तरीका बासिन्दालाई सिरहासम्म जानुपर्ने स्थिति यसअघिसम्म भएपनि अब सबै काम सप्तरीमै हुने भएको छ ।
यसअघि सप्तरीमा प्रदेश सरकारको भवन निर्माण सम्बन्धी काम मात्रै हुँदै आएको थियो । सडक र पुलसहितका भौतिक योजना कार्यन्वयनका लागि सिरहा जानुपर्ने बाध्यता थियो ।
तर, अब प्रदेश सरकारको भौतिक पूर्वाधार विकास मन्त्रालयले तीनै काम जिल्लामै हुने व्यवस्था मिलाएको छ ।
पहिला यहीं मन्त्रालय अन्तर्गत जिल्लामा शहरी विकास तथा भवन निर्माण कार्यलय जिल्लामा थियो । अब यो कार्यालयको नामै परिवर्तन गरिएको छ । कार्यालयको नाम पूर्वाधार विकास कार्यालय राखिएको छ ।
नाम परिवर्तनसँगै अब भवन, सडक, पुलसहितका भौतिक योजनाको कार्यान्वयन सप्तरीबाटै हुने भौतिक पूर्वाधार विकास मन्त्रालयका सचिव अशोक साहले जानकारी दिए ।
बिहीबार एक कार्यक्रमकाबीच नाम परिवर्तन गरिएको कार्यालयको भौतिक पूर्वाधार विकास मन्त्री कृष्ण यादवले उद्घाटन गरेका छन् ।
