राजविराज । लोकतान्त्रिक समाजवादी पार्टी (लोसपा) का वरिष्ठ नेता राजेन्द्र महतोले शाषकवर्गले देशलाई कंगाल बनाइदिएको बताएका छन् ।
लोसपा, सप्तरीले बिहीबार राजविराजमा आयोजना गरेको शुभकामना आदानप्रदान कार्यक्रमलाई सम्बोधन गर्दै महतोले यस्तो कुरा बताएका हुन् ।
संसारकै १० गरीब देशमध्ये नेपाल पनि परेको बताउँदै उनले देशमा जनता निराश बन्न थालेको बताए । ‘अब यो भन्दा देशलाई कहाँ पु¥याउने ?’ नेता महतोले भने, ‘शाष्कवर्गले देशलाई कंगाल बनाइदिए ।’
रोजीरोटीका लागि युवालाई विदेश जानुपर्ने बाध्यता रहेको र त्यहीं बाध्यताकाबीच धेरैको लास बाकसमा आइरहेको भन्दै उनले भने, ‘शाषण जनताको समृद्धिका लागि, विकासका लागि, रोजगारीका लागि हुनुपर्छ । बेइमानी, अन्यायका लागि गरिदैन् ।’
उनले देशमा संघीयता आएको भनिएपनि अधुरा संविधान आएको बताए । ‘आफ्नो शाषण, आफ्नो प्रशासनसहितको संघीयता हुनुपर्नेमा भएन् । गलत संघीयता आयो’ उनले भने, ‘त्यहीं भएर जनताको पक्षमा काम हुन सकिरहेको छैन् । जनता निराश बनेका छन् ।’
संविधान सबैको बन्न नसकेको भन्दै उनले यी समस्याको समाधानका निम्ति शक्तिशाली आन्दोलनको आवश्यक्ता रहेको बताए ।
‘सारा अधुरा काम पूरा गराउन शक्तिशाली आन्दोलनको आवश्यक्ता छ । मधेशी, थारु, जनजाती, उत्पीडनमा परेका सबैलाई एकजुट भएर आन्दोलन गर्नुपर्छ’ उनले भने, ‘यसका निम्ति सबैले मानसिकता बनाऔं ।’
लोसपा जिल्ला अध्यक्ष सुनिल कुमार झाको अध्यक्षतामा भएको कार्यक्रममा नेता जयप्रकाश ठाकुर, छिन्नमस्ता गाउँपालिकाका अध्यक्ष विद्यानन्द चौधरी, रुपनी गाउँपालिकाका अध्यक्ष दिनेश यादवसहितकाले बोलेका थिए ।
