मधेश प्रदेश सरकारको भौतिक पूर्वाधार विकास मन्त्री कृष्णा यादवले सिरहा–धनुषा जोड्ने कमला पुल भएर आरपार गर्नका निम्ति डाइभर्सन बनाउन लागिएको बताए ।
निर्माण सम्पन्न भइसकेको अवस्थामा पुल भत्किएपछि हुलाकी राजमार्ग आवतजावत ठप्प रहेको छ । जसका कारण सर्वसाधारणलाई पूर्व पश्चिम राजमार्ग घुमेर यात्रा गर्नुपर्ने हुन्छ ।
राजविराजमा बिहीबार भौतिक पूर्वाधार विकास कार्यालयको उद्घाटन गर्दै मन्त्री यादवले जनताको यहीं समस्यालाई मध्यनजर गर्दै कमला पुलमा डाइभर्सन बनाएर बाटो सुचारु गर्ने बताए । ‘यो काम चाँडै हुन्छ’ मन्त्री यादवले भने, ‘दशैं सकिएलगत्तै डाइभर्सनको काम शुरु हुन्छ ।’
डाइभर्सन बनेपछि सबै किसिमका सबारी आरपार गर्न सकिने बताउँदै उनले सर्वसाधारणको यात्रा छोटो हुँदै समयको पनि बचत हुने बताए ।
उनले भत्किएको पुल निर्माणका लागि संघीय सरकारसँग समन्वय गरिरहेको बताउँदै संघीय सरकार पनि यसप्रति चासो लिएको सुनाए ।
