राजविराज । मधेश प्रदेशका शिक्षा मन्त्री महेश प्रसाद यादवले विद्यार्थीको टाउको गणना गरी दरबन्दी कायम गरिने बताएका छन् ।
राजविराजमा आ.ब. २०८०/८१ मा स्थानीय तहमा सशर्त अनुदानमा वित्तिय हस्तान्तरण भएका कार्यक्रमको शिक्षा शाखा प्रमुख र जनप्रतिनिधीका लागि आयोजना गरिएको दुई दिने बार्षिक कार्यक्रम अभिमुखिकरण गोष्ठीलाई बिहीबार समापन गर्दै मन्त्री यादवले यस्तो कुरा बताएका हुन् ।
उनले विद्यार्थीको टाउको गणना गरेर दरबन्दी कायम गरिने र त्यसपछि शिक्षक नियुक्ति गर्नेगरी नयाँ शिक्षा नीति बनाउन लागिएको बताए । उनले राम्रो शिक्षा नीति बनाउन सुझाव दिन सबैसँग आग्रह गरे ।
उनले यसअघिको सरकारले आफ्नो कार्यकालमा शिक्षा सम्बन्धी नीति बनाउन नसक्दा शुरुवाती काम गर्न समस्या भएको बताउँदै चाँडै शिक्षा सम्बन्धी नीति बनाउन लागिएको बताए ।
उनले निरक्षर रहेको प्रदेशलाई साक्षर बनाउनु जरुरी रहेको भन्दै आफू मन्त्री भएपछि पहिलो निर्णय नै यहीं गरेको बताए । ‘यसमा सबैको साथ र सहयोग आवश्यक छ’ मन्त्री यादवले भने, ‘कुनै पनि संस्थाका प्रमुख व्यक्ति दृढ संकल्पका साथ अघि बढेमा सफलता प्राप्त हुन्छ ।’
कार्यक्रममा नेपाल पत्रकार महासंघ, सप्तरीका अध्यक्ष श्रवणकुमार देवले ओरालो लाग्दै गरेको शिक्षा क्षेत्रलाई सुधार गर्न सरोकारबाला गम्भीर बन्नुपर्ने बताए ।
शिक्षा विकास तथा समन्वय इकाईले आयोजना गरेको कार्यक्रममा सप्तरीका सबै पालिकाका शिक्षा शाखा प्रमुख र जनप्रतिनिधीको उपस्थिति थियो ।
कार्यक्रममा शिक्षा विकास तथा समन्वय इकाईका प्रमुख विजय मण्डलले सशर्त अनुदानमा वित्तिय हस्तान्तरणबारे सहजीकरण गरेका थिए ।
