राजविराज । गुणस्तरीय शिक्षाका लागि सबैले ध्यान दिनुपर्ने राजविराजमा आयोजित एक कार्यक्रमका बक्ताले जोड् दिएका छन् ।
शिक्षा विकास तथा समन्वय इकाई, सप्तरीले बिहीबार शैक्षिक गुणस्तर अभिवृद्धिका लागि मावि तहका प्रअसँग आयोजना गरेको अन्तरकृया कार्यक्रमलाई सम्बोधन गर्दै बक्ताहरुले यस्तो कुरा बताएका हुन् ।
कार्यक्रमका प्रमुख अतिथि प्रमुख जिल्ला अधिकारी किरण थापाले सामुदायिक विद्यालयमा सबैथोक हुँदाहुँदै गुणस्तरीय शिक्षा नहुनु चिन्ताको बिषय भएको बताए ।
उनले शिक्षाको विकास भए मात्र हरेक क्षेत्रको विकास हुने चर्चा गर्दै गुणस्तरीय शिक्षाका निम्ति सबै प्रअलाई अग्रसर हुनुपर्ने बताए । ‘सामुदायिक विद्यालयमा सबै थोक छ’ उनले भने, ‘राज्यले ठूलो लगानी गरेको अवस्थामा शिक्षा राम्रो बन्नु जरुरी छ ।’
नेपाल पत्रकार महासंघ, सप्तरीका अध्यक्ष श्रवणकुमार देवले जिल्लाको उत्तरी क्षेत्रका सामुदायिक विद्यालयको अवस्था ठीकठीकै भएपनि दक्षिणतिरको ठीक नभएको बताए । उनले विद्यालय राजनीतिको अखाडा बनेको भन्दै सबैले आ–आफ्नो स्वार्थ पूरा गर्न खोजेको बताए ।
नेपाल शिक्षक महासंघ, सप्तरीका अध्यक्ष दिनेश कुमार यादवले अनुगमन, निरीक्षण गर्नेले सम्पूर्ण दोष शिक्षक÷प्रअलाई नै देखाउने गरेको बताए । उनले कक्षाकोठामा शिक्षकको नियमित उपस्थित हुनुपर्ने बताउँदै शैक्षिक गुणस्तरियताका लागि सबै सरोकारबालाले ध्यान दिनुपर्ने बताए ।
उनले आन्दोलनको समयमा बन्द गरिएको २ दिन विद्यालय विदाको समयमा संचालन गरिने बताए ।
कार्यक्रममा आफ्नो प्रस्तुती गर्दै शिक्षा विकास तथा समन्वय इकाईका प्रमुख विजय मण्डलले सिकाई उपलब्धी ५० प्रतिशतभन्दा कम भएकोृ बताए । उनले विद्यार्थीको नैतिक शिक्षा र अनुशासनमा कमी आएकाले यसतर्फ सबैले ध्यान दिनुपर्ने बताए ।
जिल्ला समन्वय समितिका प्रमुख शिबनारायण साहको अध्यक्षतामा आयोजित कार्यक्रममा एन प्याव्सन सप्तरीका अध्यक्ष नरेशप्रताप साहसहितकाले बोलेका थिए ।
